Pôa Tô Lâm, Kăn xiâm pơkuâ hnê ngăn Đảng, pôa Lương Cường, Kăn xiâm hnê ngăn tơnêi têa ƀă pôa Phạm Minh Chính, Ngế pro xiâm hnê ngăn Chin phuh mơnhên Việt Nam ngăn Mih cho khu tơrŭm ki kal tung troăng pêi cheăng ton xŏn.

Ing tơdroăng pêi cheăng mơnhông mơdêk tung tơrŭm cheăng pơla péa tơnêi têa tung pơla kố nah, pôa Tô Lâm, Kăn xiâm pơkuâ hnê ngăn Đảng, pôa Lương Cường, Kăn xiâm hnê ngăn tơnêi têa ƀă pôa Phạm Minh Chính, Ngế pro xiâm hnê ngăn Chin phuh loi tơngah ƀă tơdroăng pơkuâ ƀă môi tuăn dêi pôa Donald Trump, Kăn xiâm pơkuâ kong têa Mih, tơrŭm cheăng Việt Nam – Mih kô pơtối mơnhông krá tơniăn ing pơkâ nhuô̆m tơniăn krê, hnoăng pơkuâ ƀă rơxông kal kí dêi pó, xua hơniâp lĕm, tơniăn lĕm, tơrŭm cheăng ƀă mơnhông mơdêk krá tơniăn a kơpong ƀă lâp plâi tơnêi, ki má lối cho roh péa tơnêi têa leh tơbâ 30 hơnăm mơjiâng tơrŭm cheăng tơpui kâ ƀă kong têa ê (1995 – 2025) ƀă 02 hơnăm tơrŭm cheăng ton xŏn Tâi tâng Việt Nam – Mih.

Rơtế hâi mê, jâ Võ Thị Ánh Xuân, Phŏ Kăn xiâm hnê ngăn tơnêi têa xuân hiăng pơtroh kơthô rơkâu troh Phŏ Kăn xiâm pơkuâ kong têa Mih James David Vance.