A rêm khu tê mơdró troh lăm pôu, khu râ kăn pêi hnoăng cheăng hiăng tơmâng tơbleăng ‘na tơdroăng pêi pro pêt mơjiâng tơmeăm ƀă mâu tơdroăng pêi cheăng dêi mâu khu tê mơdró. Mâu khu râ kăn pơkuâ kheăn kơdeăn mâu tơdroăng châ tơƀrê tung rak pro tơdjêp pơla hnoăng cheăng kâ ƀă gâk kring tơnêi têa, xuân môi tiah tơdroăng pêt mơjiâng tơmeăm dêi mâu tíu cheăng.

Ki rơhêng vâ tối, mâu khu xuân hiăng tối pói vâ mâu khu tê mơdró pơtối mơ’no liăn po rơdâ pêt mơjiâng tơmeăm, mơdêk ki dâi lĕm kơpong pêt, ai hên tơmeăm, po rơdâ kơchơ mơdró ƀă mơdêk pêi lo liăn ăm mơngế pêi cheăng. Khu râ kăn pơkuâ kong pơlê Dak Lak mơnhên kô đi đo pro tơ’lêi hlâu tung luât vâ mâu khu tê mơdró mơnhông mơdêk.

Xông tơpui a Kŏng ti Tơlo liăn Bia Sài Gòn – Miền Trung, pôa Nguyễn Tuấn Hà, Phŏ Kăn hnê ngăn hnê mơhno má môi Vi ƀan kong pơlê Dak Lak, tối nhên pơkâ xiâm dêi kong pơlê tung la ngiâ cho mơ-eăm châ tơtêk péa kơxô̆ tiô pơkâ dêi Ngế pro xiâm hnê ngăn Chin phuh. Vâ chiâng pêi pro tơdroăng kố, kong pơlê kal tơdroăng tơdjuôm ivá ƀă mơ-eăm dêi mâu khu tê mơdró rơtế kong pơlê pêi pro pơkâ pêi mơnhông cheăng kâ – rêh ối pơla châ pơcháu.