VOV4.Xơ Đăng - Kơxê lơ 2/3, Khu râ kăn séa ngăn dêi Kuô̆k hô̆i pêi cheăng ƀă Khu xiâm pơkuâ mơjiâng tơmeăm khoăng ‘na pêi pro Luât pơkâ mơjiâng tơmeăm. A roh pêi cheăng, Khu râ kăn séa ngăn dêi Kuô̆k hô̆i mơnhên tối ai tơdroăng ki hrá tung mơjiâng 2 pơkâ mơjiâng tơmeăm kơvâ tơnêi têa, mê cho: Pơkâ mơjiâng pro tíu kuăn pơlê rêh ối kơdrâm ƀă thôn pơlê ƀă Pơkâ pêi tơdroăng vâ uâ mơdiê, xúa tơmeăm khoăng tung kơdâm tơnêi cho tơmeăm mơjiâng pro hngêi trăng, troăng klông.

Tiâ tối mơnhên xiâm kối xua ti lâi chiâng hrá, pôa Nguyễn Thanh Nghị, Ngế xiâm pơkuâ tơdroăng mơjiâng tơmeăm khoăng, tối ăm ‘nâi: Pơkâ luât nếo pơkâ ‘na troăng mơjiâng pro, troăng pơkâ pêi tiô troăng ki tơdjêp kal ai tơdroăng ki tơrŭm tơdrêng, tơdâng tơ’mô dêi mâu kơvâ cheăng, mâu râ.

Pôa Nguyễn Đức Hải, Kăn xiâm phŏ hnê ngăn Kuô̆k hô̆i pơkâ thế Khu xiâm pơkuâ mơjiâng pro tơmeăm khoăng pơtối séa ngăn, ai tơbleăng tiâ inhên mâu tơdroăng châ khu tơrŭm cheăng Khu séa ngăn pơkâ, tung mê, tơkŭm pêi kêi đeăng 2 pơkâ pêi kơvâ tơnêi têa vâ tơbleăng Ngế pro xiâm hnê ngăn tơnêi têa kĭ tung khế 12 hơnăm kố.

A Sa Ly tơplôu ƀă tơbleăng