Hâi lơ 11/9, a Tíu pêi cheăng Xiâm Đảng, ing hnoăng pơkuâ dêi pôa Tô Lâm - Kăn xiâm pơkuâ ngăn Đảng ủy Kuô̆k hô̆i vâ ăm hnê tối a tơdroăng chêh mâu hlá mơ-éa, troăng hơlâ ‘na mơngế ƀă tơdroăng cheăng hbrâ hneăng hôp mâu kăn Đảng ƀô̆ Kuô̆k hô̆i rôh má 1, hneăng 2025-2030.

A rôh pêi cheăng, Khu xiâm kal kí khê̆n kơdeăn tơdroăng chêh mê ƀă troăng hơlâ mơngế châ Đảng ủy Kuô̆k hô̆i hbrâ nhên kơtăng, hên tơdroăng, khoa hok tro mâu pơkâ ƀă hnê mơhno dêi Tíu xiâm; pakĭng mê ăm hnê tối khâ vâ tơ’nôm, pê klêi Hlá mơ-éa chêh hneăng hôp.

Pôa Tô Lâm - Kăn xiâm pơkuâ ngăn Đảng tối nhên tung hneăng la ngiâ, Đảng ƀô̆ Kuô̆k hô̆i kal tơkŭm mâu kăn tơdroăng mơnhông rơdêi tơdroăng mơjiâng Đảng krúa lĕm, rơdêi tâi tâng; pơ’lêh troăng hơlâ pơkuâ hnê túa ki nếo; kơhnâ mơ-eăm, thâ pêi nhên tơdroăng pêi, troăng hơlâ, luât pơkâ, tơdroăng dêi Đảng chiâng luât pơkâ, luât pêi pro ki khât. Kăn xiâm pơkuâ ngăn Đảng pơkâ thế, tơkŭm pơkuâ, hnê mơhno klêi tơdroăng tâ phĭu rah xo kăn Kuô̆k hô̆i hneăng 16 ƀă kăn Hô̆i đong kuăn pơlê rêm râ hneăng hơnăm 2026-2031.

Kăn hnê ngăn pêi tro hnoăng cheăng mơjiâng luât; mơjiâng luât cho tơdroăng pêi ‘’tơbrê dêi ki tơƀrê”, tah tíu ki pá, tơvâ tơvân; mơhnhôk, po troăng tăng mơngế rơkê ăm tơdroăng mơnhông tơnêi têa.