Jâ Phạm Thị Thanh Trà, Ngế xiâm pơkuâ kăn ƀô̆ tối ăm ‘nâi, hâi lơ 14/3, Khu xiâm pơkuâ Kal kí hôp môi tuăn troăng hơlâ rah xo bro lế lĕm tro, vêh po tíu pơkuâ tơnêi têa mâu râ ƀă mơjiâng troăng pêi po khu râ kăn pơkuâ pơlê pơla 2 râ, tung mê ai troăng tơ’mot mâu kong pơlê, tah râ tơring, tơmot hên cheăm. Kơ’nâi mê, Đảng ủy Chin phuh kô pơtroh tơdroăng tơkêa bro xo rơkong tơpui dêi mâu kong pơlê ƀă pơtroh mâu khu xiâm, kơvâ cheăng tơpui tối.

Tiô tối hdrối tung dế khế 4/2025, Khu hnê mơhno tơbleăng Khu xiâm pơkuâ tơnêi têa. Tối troh tơdroăng vêh po tíu pêi cheăng pơkuâ râ cheăm, Ngế xiâm pơkuâ kăn ƀô̆ tối nhên, nôkố râ cheăm ai 10.035 tíu pêi cheăng, tiô tối hdrối kô vêh po bu u ối dâng 2 rơpâu – ‘’mê cho môi tiah môi tơring kŭn’’. Tơdroăng kố ối tung hnoăng dêi Vi ƀan pơkuâ Kuô̆k hô̆i, kô chiâng pêi tơdrêng hlối klêi Hneăng hôp Khu pơkuâ Tơnêi têa.

Klêi Luât ‘mâi rơnêu, tơ’nôm Luât khu râ kăn pêi cheăng rơtế mâu luât ai tơdjâk, Ngế xiâm tối ăm ‘nâi kô mơgêi tơdroăng pêi cheăng dêi khu râ kăn râ tơring.