Môi tiah hiăng tối, kơxêi lơ 22/1/2026, hneăng Hôp kân mâu kăn teăng mâ lâp tơnêi têa má 14 dêi Đảng hiăng pôk Khu kăn xiâm pơkuâ hnê ngăn Đảng hneăng 14 ai 200 ngế, tung mê 180 ngế ki păng ‘nâng ƀă 20 ngế ki hbrâ.

Kơxo hâi lơ 23/1, hneăng Hôp rôh má môi Khu xiâm pơkuâ hnê ngăn Đảng hneăng 14 tâ phĭu, pôk vâ rah xo Khu xiâm kal kí, pôk Kăn xiâm pơkuâ hnê ngăn Đảng, pôk Kăn xiâm hnê ngăn; tơmâng tối tơbleăng ‘na tơdroăng cheăng dêi mâu Kăn hnê ngăn xiâm Đảng, Tơnêi têa ƀă ăm veăng tơpui tối ‘na mơngế ki xo pêi hnoăng cheăng pro Kăn xiâm hnê ngăn; Pôk Vi ƀan Séa ngăn Tíu xiâm; pôk Kăn hnê ngăn Vi ƀan Séa ngăn Tíu xiâm.

Khu xiâm pơkuâ hnê ngăn Đảng hneăng 14 hiăng vâ môi tuăn pôk pôa Tô Lâm to pro Kăn xiâm pơkuâ hnê ngăn Khu xiâm Đảng hneăng 13 pơtối pro Kăn xiâm pơkuâ hnê ngăn Khu xiâm Đảng hneăng 14.

Pôa Tô Lâm - Kăn xiâm pơkuâ hnê ngăn Đảng ai hên hnoăng cheăng ki hdró tung pơkuâ hnê mơhno dêi Đảng ƀă po troăng hơlâ mơnhông tơnêi têa riân sap ing châ Khu kăn xiâm pơkuâ hnê ngăn Đảng hneăng 13  rah xo pro Kăn xiâm pơkuâ hnê ngăn Đảng Kŏng sản Việt Nam hneăng 13 a khế 8/2024.

Tơdroăng pơ’lêh xing xoăng pro rế lĕm, rah iâ mơngế pêi cheăng tơnêi têa tiô Pơkâ kơxô̆ 18 - NQ/TW châ tơbleăng rơdêi tung iâ khế, ƀă ki hên má môi sap ing nah troh nôkố ƀă ăm hlo ki tơƀrê luâ tâ, ôh ti xê to a kơdroh kơxô̆ mơngế mê ‘na khu tơrŭm cheăng, tíu pêi cheăng, kơdroh ƀiên chê̆, kơdroh kơxô̆ liăn ki hrê đi đo mê ki kal tâ cho hiăng mơdêk ivâ pêi cheăng tơƀrê dêi khu kăn xiâm, kơdroh râ ki tơdế rá, xoăng râ, xoăng hnoăng châ mơdêk pêi tiô troăng hơlâ achê kuăn pơlê, pêi cheăng pơxúa ăm kuăn pơlê; hiăng po troăng bâ phuâng, pro xiâm ki vâ mơnhông cheăng kâ – rêh ối pơlê pơla ăm mâu hơnăm pơtối.

Sap mơ’nui hơnăm 2024 troh nôkố, Khu xiâm Kal kí hiăng tơbleăng 9 tơdroăng pơkâ ki ai pơxúa tung tâi tâng mâu kơvâ cheăng xiâm dêi tơnêi têa. Kố cho mâu troăng hơlâ ki kân tơdâng, mơhno tuăn tơmiât hơ’lêh nếo, mâ ngăn tuăn tơmiât pêi ton hơnăm ƀă mơ-eăm kal kí khât dêi Đảng; cho xiâm vâ mơnhông tơná xông tơƀrê kro mơdrŏng ƀă hơniâp ro tung chal nếo.