Trối tơdroăng ki nếo ai hiăng chêh, kơxê hâi lơ 22/1/2026, Hneăng hôp kân mâu kăn teăng mâ lâp tơnêi têa roh má XIV dêi Đảng hiăng pôk Khu kăn xiâm pơkuâ hnê ngăn Tíu xiâm Đảng hneăng XIV ai 200 ngế cho Ủi viên, tung mê, ai 180 ngế Ủi viên cho păng ‘nâng ƀă 20 ngế Ủi viên ki hbrâ.

Kơxo kố, lơ 23/1, Roh hôp má môi Khu xiâm pơkuâ hnê ngăn Đảng hneăng XIV hiăng po roh hôp vâ pôk Khu xiâm pơkuâ ngăn cheăng Kal kí, pôk Kăn xiâm pơkuâ hnê ngăn, pôk Khu xiâm pơkuâ hnê ngăn; tơmâng tối tơbleăng ‘na mâu troăng hơlâ cheăng dêi mâu kăn ki pơkuâ hnoăng cheăng xiâm dêi Đảng, Tơnêi têa ƀă ăm mâu kăn tơpui tối ‘na mơngế ki châ rah xo pro Kăn tung Khu xiâm pơkuâ hnê ngăn Má môi, pôk Vi ƀan Seá ngăn khu xiâm Đảng; pôk Kăn hnê ngăn Vi ƀan Séa mơnhên Tíu xiâm.

Khu xiâm pơkuâ hnê ngăn xiâm Đảng hneăng XIV hiăng môi tuăn vâ tâi tâng pôk pôa Tô Lâm, Kăn xiâm pơkuâ hnê ngăn - Khu xiâm pơkuâ hnê ngăn Đảng hneăng XIII pơtối rak hnoăng cheăng Kăn xiâm pơkuâ hnê ngăn Tíu xiâm Đảng hneăng XIV.

Pôa Tô Lâm hiăng chôu ‘măn hên mâu hnoăng cheăng ki kal kân tung pơkuâ hnê ngăn Đảng ƀă po troăng hơlâ ki krá kâk, ton xŏn vâ mơnhông ăm tơnêi têa riân sap ing châ Khu xiâm pơkuâ hnê ngăn Tíu xiâm Đảng hneăng XIII pôk pro Kăn xiâm pơkuâ hnê ngăn Khu xiâm pơkuâ hnê ngăn Tíu xiâm Đảng Kŏng san Việt Nam hneăng XIII a khế 8/2024.

Hneăng pơhlêh kân tung ‘mâi xing xoăng, rah xo iâ cheăng tung khu xiâm tiô tơdroăng Pơkâ kơxô̆ 18-NQ/TW hiăng châ pơkâ pêi pro ó rơdêi tung pơla iâ hâi khế, ƀă hnoăng cheăng ki pơhlêh kân ó má môi sap ing nah troh nôkố ƀă ki châ tơƀrê mê hiăng pro tơdroăng cheăng ki pơhlêh kân, ôh tá xê to kơdroh kơxô̆ khu pơkuâ cheăng, mâu tíu cheăng, kơdroh ƀiên chê̆, kơdroh kơxô̆ liăn ki mơ’no rêm hâi mê ki kal luâ tâ kơ mê cho hiăng thăm mơdêk ki tơƀrê, ai pơxúa dêi khu xiâm pơkuâ, kơdroh mâu kơlo ki ối tơdế rá, xing xoăng râ, xing xoăng hnoăng châ pêi pro tơdêi tiô troăng ki achê kuăn pơlê, ‘nâi nhên kuăn pơlê, tŏng gum kuăn pơlê lĕm tro tâ; hiăng po ăm tơnêi tíu cheăng, po troăng hơlâ tơ’lêi ăm khu pơkuâ ngăn, mơjiâng kơpong tíu ki vâ mơnhông pêi cheăng kâ, pêi lo liăn ngân, rêh ối pơlê pơla ăm hneăng pơtối la ngiâ.

Ing mơ’nui hơnăm 2024 troh nôkố, Khu xiâm ngăn ‘na cheăng Kal kí hiăng mơ’no 9 tơdroăng pơkâ ki ai pơxúa kân, krá tơniăn ton tung tâi tâng rêm kơvâ cheăng ki xiâm dêi tơnêi têa. Kố cho mâu troăng hơlâ ki po troăng ki kân, tơdrêng, mơhno tối tuăn mơno pơhlêh nếo, hnoăng cheăng mơnhên ngăn ton xŏn ƀă khŏm mơ-eăm pêi pro hnoăng cheăng kal kí ki tro má môi dêi Đảng; cho ki xiâm vâ chông djâ tơnêi têa mơnhông dêi tơná, tơtêk kro mơdrŏng, ó rơdêi ƀă xông rơdêi mơdrŏng tung chal ki nếo.