A leh mơhnhôk, Đăi tươ̆ng Lương Tam Quang, Ngế xiâm pơkuâ Kŏng an pơkâ thế Kăn pơkuâ Kŏng an mâu tíu cheăng tiô tơdroăng xiâm tơ’noăng tung Pơkâ pêi dêi Khu xiâm ƀă 21 tơdroăng ki xiâm inhên ‘’Pơkâ thế pêi tiô má môi; Môi tuăn má môi; Achê kuăn pơlê má môi’’ vâ tơ’nôm tơdroăng, pơkâ pêi cheăng; rêm khế tung hôp chi ƀô̆ rêm kăn pơkuâ, kăn ƀô̆ mâu lêng, rêm tíu cheăng séa ngăn, hvái ngăn tơdroăng cheăng, tối inhên rêm tơmeăm, tơdroăng châ tơƀrê mơhno “Pơkâ thế pêi tiô má môi; Môi tuăn má môi; Achê kuăn pơlê má môi’’ hiăng châ tơƀrê.

Pôa Lương Tam Quang loi tơngah, rêm kăn pơkuâ, rêm kăn ƀô̆ lêng tung Kŏng an kuăn pơlê kô mơ-eăm rêm hâi, djâ tơdroăng tơ’noăng Pái má môi troh lâp lu ó rơdêi, păng ‘nâng chiâng tơdroăng mơdêk pêi pro ƀlêi trâng Tơdroăng pơkâ Hneăng hôp Đảng ƀô̆ Kŏng an Tơnêi têa roh má VIII, djâ tơdroăng tơniăn gâk kring, tơniăn veăng kum tơxâng tung rơxông nếo dêi tơnêi têa ing pơkuâ dêi Đảng.