VOV4.Xơ Đăng - Kơxo lơ 13/1, a Hà Nội, Khu xiâm pơtâng tối mơhnhôk kuăn pơlê tơkŭm po hneăng hôp mơ’no tơdrêng tung um tiô troăng Internet mơgêi tơdroăng pơtâng tối mơhnhôk kuăn pơlê ƀă mơnhên tơdroăng châ tơƀrê pêi pro hơnăm ‘’Thăm pêi pro troăng pơkâ pêi kuăn pơlê pơkuâ dêi hnoăng cheăng a pơlê’’ hơnăm 2021, po rơdâ hnoăng cheăng hơnăm 2022. Pôa Võ Văn Thưởng, Kăn cheăng tung Khu xiâm kal kí, Kăn pơkuâ hnê mơhno má môi tơdroăng cheăng Đảng tơnêi têa veăng ƀă hnê mơhno hneăng hôp.

Xông tơpui hnê mơhno a hneăng hôp, pôa Võ Văn Thưởng pơkâ thế kơvâ pơtâng tối mơhnhôk kuăn pơlê kal hbrâ ‘nâi nhên, tối teăm tơdrêng tơdroăng tơmiât, pói vâ tơxâng dêi kuăn pơlê ăm khu râ kăn pơkuâ cheăng Đảng, khu râ kăn pơkuâ séa ngăn tơleăng, ki má lối cho mâu tơdroăng tơdjâk troh tơdroăng rêh ối, cheăng pêi, pêi lo liăn dêi kuăn pơlê.

Tơdrêng amê kal hlê plĕng trâu hơngế, tŭm tâ troăng tơmiât ‘’Kuăn pơlê cho xiâm rêi’’, mơnhông mơdêk ivá dêi kuăn pơlê, ivá rŭm môi tuăn lâp hdroâng mơngế. Thăm pêi pro tơdroăng tơ’noăng ‘’Pơtâng tối mơhnhôk kuăn pơlê rơkê’’ dêi khu cheăng kal kí, ƀă mâu roh mơhnhôk, tơdroăng tơ’noăng pâ nhuô̆m tơnêi têa tung mâu kơvâ cheăng, tơniăn tơxâng tiô pơkâ nôkố, châ tơƀrê.

A Sa Ly tơplôu ƀă tơbleăng