Rôh hôp châ tơkŭm po kơxê hâi lơ 3/3 a tíu pêi cheăng dêi Khu xiâm rak ‘na liăn ƀă veăng ai pôa Hồ Đức Phớc, Phŏ Ngế pro xiâm hnê ngăn tơnêi têa ƀă pôa Nguyễn Chí Dũng, Phŏ Ngế pro xiâm hnê ngăn tơnêi têa.

A rôh  hôp, Ngế xiâm ngăn Khu tơrŭm cheăng ngăn ‘na kăn ƀô̆ dêi Khu xiâm ngăn liăn ngân hiăng pơchuât tơbleăng tơdroăng Pơkâ dêi Chin phuh ai pơkâ ‘na hnoăng cheăng pêi dêi Khu xiâm rak Liăn ngân klêi tơ’mot, tơbleăng mâu Pơkâ dêi Ngế pro xiâm hnê ngăn Chin phuh rah xo 5 ngế phŏ ki nếo xo pêi hnoăng cheăng dêi Khu xiâm ngăn ‘na Liăn.

Pôa Hồ Đức Phớc, Phŏ Ngế pro xiâm hnê ngăn tơnêi têa ƀă pôa Nguyễn Chí Dũng hiăng diâp hlá mơ-éa pơkâ ăm ngế nếo to pro Phŏ Kăn rak ‘na Liăn ngân. A rôh hôp xuân tơbleăng Pơkâ mơjiâng Đảng ƀô̆ Khu xiâm ngăn ‘na liăn, Pơkâ mơhno thế veăng pêi cheăng tung Khu kăn, Khu pơkuâ cheăng, Kăn pơkuâ hnê ngăn Đảng, Phŏ Pơkuâ hnê ngăn Đảng ủy Khu xiâm ngăn ‘na Liăn ngân hneăng hơnăm 2020-2025, klêi mê tơbleăng mâu pơkâ pôk Kăn hnê ngăn (râ ngế pơkuâ) dêi 35 tíu pêi cheăng xiâm dêi Khu xiâm xuân môi tiah diâp pơkâ ăm mâu kăn hnê ngăn mâu tíu pêi cheăng ki nếo xo pêi hnoăng cheăng.