Nôkố lâp kong pơlê Dak Lak ai lối 137 .000 đảng viên, 1.045 khu cheăng đảng a cheăm bêng ƀă lối 6.000 chi ƀô̆ cho khu kăn râ kơpêng pơkuâ. Klêi xing xoăng pro rế lĕm a tíu pêi cheăng, Dak Lak hiăng mơjiâng 102 Đảng ƀô̆ cheăm bêng nếo; tâi tâng tơdroăng chêh ‘mot tung kơmăi ‘na đảng viên châ po tung kơmăi rak ngăn tơdjuôm. Pêi pro tro tơdroăng chêh tung hla mơ -éa cho “pơ’lêh tro túa tơrŭm cheăng Đảng a cheăm bêng, mơdêk tơbrê tơdroăng tơkŭm hôp dêi chi ƀô̆”. Kong pơlê hiăng pơkâ hên troăng hơlâ hnê vâ ‘mâi mơnhông tơdroăng tơkŭm hôp pêi cheăng ƀă rế hên đảng viên ối a kơpong hơngế hơngo. Pôa Y Nhuân Ƀyă, Phŏ pơkuâ khu kăn kong pơlê Dak Lak, ăm ‘nâi:

“Má môi, pơtối mơnhông hnoăng cheăng hnê tối vâ pêi kơtăng tro Luât Đảng; má péa, hnê nhên ăm râ cheăm bêng vâ mơdêk ki tơƀrê tung tơkŭm hôp pêi cheăng; má pái, mơdêk tơbleăng mâu ngế pêi cheăng kơhnâ rơkê, ai tuăn lĕm vâ rah mot đảng viên a kơpong hơngế hơngo; ƀă má pŭn; rêm hơnăm thế ai séa ngăn nhên tơrêm tơdroăng kal dêi rêm râ ủy, tơrêm chi ƀô̆ ‘na tơdroăng pêi pro tiô luât Đảng”.

Tơdroăng mê xuân tơtro ƀă troăng hơlâ tung Hlá mơ-éa chêh Tơbleăng mơgêi cho “tơ’nôm pơkâ nhên ‘na tơdroăng tơkŭm hôp  tiô rơnó dêi chi ƀô̆, tơkâ luât tơdroăng ki bú pro mơhno ăm hlo a mâ, lơ nhoăm tung tơdroăng thế tối nhên tơdroăng pro hâi tro hâi pêi pro”. A Dak Lak, luâ mâu rôh séa ngăn hơnăm 2024, 85% khu tơrŭm cheăng Đảng châ tối pê klêi hnoăng cheăng; laga xuân ối lối 30 chi ƀô̆ tơkŭm hôp tro tiô pơkâ, tơdroăng kal hâi trâu rơdâ. A Pơlê cheăm, tơdroăng rak ngăn đảng viên, xuân tơdroăng ki pâ.

Pôa Nguyễn Ngọc Tịnh- Kăn hnê ngăn Chi ƀô̆ tôh dân phŏ 6 Tân Lợi, bêng Buôn Ma Thuột - tối: Klêi tơ’mot tơdjuôm, hên cheăm, bêng ai kơxô̆ đảng viên krâm, tung mê ki vâ tối cho đảng viên hơnăm ối nếo lăm pêi cheăng hơngế rế hên, pro tơdroăng pơtối tơkŭm hôp chi ƀô̆ trâm hên xơpá.

“Chi ƀô̆ ngin ai 30% đảng viên hơnăm ối nếo lăm pêi cheăng hơngế, tơdroăng rak ngăn xơpá. A pâ thế kal tối trâu tâ ‘na rak ngăn đảng viên a cheăm bêng, ôh tá xê tơmâng to kơxô̆ mê thế tơmâng khât ki tơƀrê’’.

Khi khât mê xuân tro ƀă tơdroăng ki chêh tung hlá mơ-éa ai nếo tối: “Kal tăng ‘nâi plĕng tơ’nôm pơkâ ‘na rak ngăn đảng viên ki lăm pêi cheăng ukố umê, đảng viên pa kong kơpong tơnêi têa”: Tiô Khu kăn Tỉnh ủy Dak Lak a hên cheăm hơngế hơngo, kơxô̆ đảng viên ôh tá troh veăng hôp rêm rôh sap 15 - 20%. Mâu chi ƀô̆ bú ối péa pái ngế đảng triên ki ối pơtân a mê tê ki veăng hôp thế hôp tơdjuôm ƀăng.

Hlo ti mê, kong pơlê dế mơ-nơnúa phần mêm “Rak ngăn đảng viên ki lăm pêi cheăng tíu ê”, pơcháu ăm râ ủy cheăm ki mê pơkuâ ngăn po ngăn tung kơmai ƀă pơtối veăng hôp ăm mâu đảng viên ki lăm pêi cheăng hơngế.

Ngăn ing tơdroăng tăng ngăn, tơdroăng chêh mơgêi dêi Tíu xiâm hdró tơdroăng cheăng xéa ngăn, tăng ngăn “hiăng châ mơdêk pêi pro la xuân ối pá tơvâ tơvân tung tơdroăng châ ‘nâi, pơxâu phâk pro xôi luât ƀă séa ngăn rêm hâi”. A Dak Lak, pơla hơnăm 2021-2025, lâp tung kong pơlê hiăng po 1.200 rôh séa ngăn, tăng ngăn; châ ‘nâi ƀă ‘mâi rơnêu lối 300 tơdroăng ki pro xôp, kơdroh vâ chê 30% tâng vâ pơchông ƀă hneăng hdrối. 100% kăn ƀô̆ séa ngăn châ hriâm pơ’lêh kơxô̆, chôa lâng mơjiâng túa pêi cheăng ‘’séa ngăn mâu tơdroăng chêh ‘mot tung kơmăi “kum rĕng cha ‘nâi ki xôi, hbrâ mơdât ing xiâm.

Tiê̆n sih Phạm Thị Xuân Nga - Kăn phŏ pơkuâ tíu pêi cheăng Viện Khoa học Xã hội kơpong tơdế Tơnêi têa ƀă Tây Nguyên tối tiah kố, vâ pêi tro tơdroăng chêh tung hlá mơ-éa Hneăng hôp má 14, kal pê klêi luât séa ngăn krê ƀă tơdrăng tâ:

“Ing tơdroăng tơkŭm hôp chi ƀô̆, ngin hlo kal mơdêk ki tơdrăng, môi tuăn kuăn pơlê tung séa ngăn; tơkâ luâ ki nhoăm tung tơdroăng tối ‘na đảng viên, hlối mơdêk xua kŏng ngê̆ tung rak ngăn ƀă tơkŭm tơdroăng ki ăm hlo pêi pro tiô luât Đảng”.

Pakĭng séa ngăn mâu kăn ƀă tơdroăng chêh xuân ‘nâi nhên hnoăng cheăng séa ngăn pơlê pơla dêi Măt trâ̆n Tơnêi têa Việt Nam ƀă mâu khu kal kí, pơlê pơla. A Dak Lak, rêm hơnăm Măt trâ̆n tơrŭm ƀă pêi rêm hơnăm tơdroăng séa ngăn ‘na pêi pro tiô luât kuăn pơlê a cheăm, tơdroăng cheăng kăn ƀô̆, tơleăng mơnhên săm phoăng, săm tơkêng, tơbleăng tơdrăng liăn ngân, hiâm mơno ki lĕm ‘na tơdroăng cheăng ƀă tơdroăng tối inâi mơngế ối a ko.

Hơnăm 2024, tâi tâng Măt trâ̆n hiăng pêi lối 250 rôh séa ngăn, pâ thế dêi 420 tơdroăng kal châ kơ koan râ kơpêng tơmâng, pâ thế 420 tơdroăng kal châ kơ koan râ kơpêng tơmâng xo, tối nhên. Tiô đảng viên hơnăm hiăng krâ Lê Hữu Chỉnh ối a bêng Buôn Ma Thuột mê Măt trận Tơnêi têa séa ngăn cho tơtro má môi.

“Séa ngăn dêi Măt trâ̆n rơdêi khât, xua măt trâ̆n cho ki tâi tâng kuăn pơlê. Riân to tung kơvâ cho ki kal vâ mơngế vê hdró riân ngăn mê cho Măt trâ̆n, xua măt trâ̆n ôh tá ai hnoăng ki klâi cho hnoăng mâu kăn. Á tối tiah mê cho tro ƀă ki kal cho pơtối rak pêi hnoăng cheăng dêi Măt trâ̆n, ki mê xuân tro ƀă tuăn vâ dêi Đảng ƀă tro hiâm tuăn kuăn pơlê”.

Tơniăn pêi pro Dak Lak kô hlo, tơdroăng ki kal tối kơpêng tung Hlá mơ-éa chêh tơbleăng mơgêi hneăng hôp 15 hơnăm pêi pro tiô luât Đảng dế châ kong pơlê pơ'lêh ƀă pêi pro ƀă túa pêi ki khât. La mâu hnoăng mê châ xúa tung rêh ối, kal pơtối pê klêi luât séa ngăn, tăng ngăn đi đo sap chi ƀô̆ troh râ kong pơlê, pakĭng mê luât ‘mâi hơ’lêh séa ngăn pơlê pơla dêi kuăn pơlê ƀă Măt trâ̆n tung Luât ‘mâu hơ’lêh. Drêng séa ngăn ƀă tăng ngăn chiâng hmâ ‘mâi rơnêu xêh, Luât Đảng mê nếo xêt cho tro ƀă tơdroăng pêi pro tung rêh ối kal kí dêi Đảng.