VOV4.Xơ Đăng - Hơnăm 2021, Dak Lak hiăng kâi prôk tơkâ luâ môi hơnăm ƀă ai hên tơdroăng ki pơloăng, xơpá ƀă hiăng pêi klêi mâu tơdroăng ki kal, pro chiâng ivá ăm hơnăm 2022 ƀă pêi pro tơdroăng pơkâ Hneăng hôp Đảng ƀô̆ kong pơlê rôh má 17, hneăng hơnăm 2020 -2025. Hương Lý, ngế chêh hlá tơbeăng cheăng tung Rơ’jiu Việt Nam a Tây Nguyên ai roh kơ-êng pôa Nguyễn Đình Trung, Ngế cheăng tung tíu xiâm Đảng, kăn pơkuâ ngăn Đảng kong pơlê Dak Lak ‘na mâu tơdroăng ki Đảng ƀô̆, khu kăn pơkuâ ƀă kuăn pơlê mâu hdroâng kuăn ngo kong pơlê Dak Lak hiăng pêi klêi rơtế ƀă ivá khŏm mơ-eăm rơdêi pêi pro “péa tơdroăng” tung mâu hơnăm ki pơtối.

-Ô pôa Nguyễn Đình Trung, Ngế cheăng tung tíu xiâm Đảng Tơnêi têa, Kăn pơkuâ hnê ngăn Đảng kong pơlê Dak Lak, hơnăm 2021 hiăng vâ chê tâi, kố xuân cho hơnăm apoăng Dak Lak tơbleăng pêi tiô Pơkâ hneăng hôp Kân Đảng ƀô̆ kong pơlê roh má 17 ‘na pơkâ cheăng kâ-rêh ối hơnăm 2021-2025.

-Pôa Nguyễn Đình Trung: “Hơnăm 2021 tung pơla dế trâm hên xơpá xua pơreăng COVID-19 ƀă tro tơdjâk dêi mâu tơdroăng ki ê tung kong pơlê, Khu pơkuâ hnê ngăn Đảng kong pơlê hiăng tơkŭm pơkuâ ngăn, hnê mơhno ăm rêm râ mâu kăn ƀă kuăn pơlê tung kong pơlê pêi tro tơdroăng hbrâ mơdât pơreăng ƀă mâu tơdroăng mơnhông cheăng kâ rêh ối, tơdroăng mơjiâng Đảng, tơdroăng mơjiâng khu cheăng kal kí ƀă tuăn tơmiât “thăm rế trâm hên xơpá pơloăng mơnúa mê thăm rế pơtối rak ki môi tuăn dêi rơpó, mơ-eăm khât tung tơbleăng pêi mâu tơdroăng cheăng hiăng pơcháu”. 

Klêi mâu tơdroăng cheăng pêi dêi hơnăm 2021, kong pơlê hiăng pêi châ hên tơƀrê. ‘Na mơnhông cheăng kâ - rêh ối mê ai 15/16 pơkâ hiăng châ pêi luâ tiô pơkâ. Tung mê, tơngah liăn ‘no mơjiâng pro tơmeăm khoăng xúa tung rêh ối dâng lối 42 rơpâu 100 rơtal liăn, châ 141% tâng pơchông ƀă tơdroăng pơkâ. Tâi tâng liăn ngân tơnêi têa riân châ 8 rơpâu 200 rơtal liăn, châ 152% tâng vâ pơchông ƀă tơdroăng tối hdrối dêi tơnêi têa ai pơchau. Kơxô̆ cheăm châ mơnhên tối thôn pơlê nếo ‘na luât 2 tơdroăng cheăng ƀă tơdroăng pơkâ pêi pro ki nhên. Tung mơnhông cheăng kâ dêi kong pơlê, mê mơnhông mơdêk on tơhrik ki ‘mâi pro cho môi tơdroăng tơ-ƀrê tung pêi cheăng ƀă kơmăi kơmok dêi kong pơlê. Kong pơlê hiăng tơ’mot khu 28 tơdroăng tơkêa bro vâ mơjiâng tơmeăm khoăng ƀă tâi tâng kơxô̆ liăn lối 24 rơpâu rơtal liăn. Hên tơdroăng tơkêa bro nếo hiăng châ  pêi pro veăng mơnhông cheăng kâ-rêh ối dêi kong pơlê. Hơnăm 2021, tơdroăng cheăng mơjiâng Đảng, tơdroăng mơjiâng khu cheăng kal kí xuân châ tơnêi têa tơmâng tơbleăng pêi tơdrêng ƀă ăm hlo châ tơ-ƀrê hên.

Pôa Nguyễn Đình Trung, Ngế cheăng tung tíu xiâm Đảng, Kăn hnê ngăn Đảng kong pơlê Dak Lak

-Mê, pakĭng mâu tơdroăng pêi châ tơ-ƀrê ‘na mơnhông cheăng kâ - rêh ối, tơdroăng cheăng mơjiâng Đảng, mơjiâng khu cheăng kal kí châ kong pơlê Dak Lak đi đo tơmâng tơbleăng pêi pro. Kố châ ngăn cho tơdroăng cheăng ki pá, tơvâ tơvân, kal pêi pro nhên khât. Tiah mê, pơxiâm mot tung hơnăm má 2, pêi pro tiô Pơkâ Hneăng hôp kân rôh má 13 dêi Đảng ƀă Hneăng hôp Đảng ƀô̆ kong pơlê roh má 17, tơdroăng cheăng mê châ pơtối mơdêk pêi pro ti lâi ô pôa? 

Pôa Nguyễn Đình Trung: “Tơdroăng pơkâ dêi khu kăn Đảng kong pơlê hơnăm 2020 hiăng tối: “Pơtối mơdêk rơdêi tơdroăng cheăng mơjiâng ‘mâi rơnêu Đảng tiô tơdroăng pơkâ xiâm má 9, hneăng 12 ƀă 13 rơtế ƀă tơdroăng pêi pro tiô kơxô̆ 05 ƀă tối mơgêi kơxô̆ 01, hâi lơ 18/5/2021 dêi khu xiâm Kal kí ƀă mâu tơdroăng cheăng kal  môi tiah kơ’nâi kố:

-Má môi, tơkŭm tơbleăng pêi tơdroăng tối mơgêi kơxô̆ 21, hâi lơ 25/10/ 2021 dêi khu xiâm Đảng ‘na mơdêk mơjiâng ‘mâi rơnêu mâu Đảng ki rế ôh tá tro ‘na tuăn tơmiât tơdroăng kal kí, ‘na hiâm mơno, tơdroăng rêh ối, ki  tí tăng hriăn pêi pro xêh, pro ôh tá tro.

-Má péa, mơjiâng khu Đảng viên ai tŭm ivá, hiâm mơno lĕm, hên ngế loi tơdâng ƀă tơdroăng cheăng. Pơ’lêh nếo, pơ’lêh xing xoăng bếo khu kăn pêi cheăng châ tơ-ƀrê dêi tơdroăng kal kí rơtế ƀă kơdroh biên chê̆. ‘Mâi xing xoăng nếo mâu kăn ƀô̆, mâu ngế pơkuâ kơ koan, tíu pêi cheăng, mâu ngế pêi cheăng a mâu kơ koan ƀă mơjiâng tơdroăng cheăng pêi.

-Má pái, pơ’lêh nếo tơdroăng cheăng, mơdêk ivá pơkuâ ivá tơplâ dêi khu tơrŭm cheăng Đảng, mơngế đảng viên. Tung mê mơdêk hnoăng cheăng pêi ahdrối, djâ troăng lĕm ‘na pơtối rak vế hnoăng cheăng pêi dêi đảng viên. Mơdêk tơdroăng séa ngăn, tăng ngăn,  pơkâ rak tro luât, hnê khĕn mâu ki ôh vâ rak luât.

-Má pŭn, mơdêk ki tơ-ƀrê tơdroăng cheăng hbrâ mơdât pơxâu phak mâu ngế kâ kơluâ, chôa mơdât iâ klêi mê troh tah mâu ki kâ kơluâ, mơ’nhiê liăn ngân tê kơtê. Mơdêk rĕng séa ngăn, pơxâu phak mâu ngế pro ôh tá tro tơdroăng, ƀă tơdroăng tơkêa bro. Malối cho tơdroăng kâ kơluâ, mâu tơdroăng tơvâ tơvân ki kuăn pơlê rơhêng vâ ‘nâi plĕng.

Tơdroăng má mơ’nui cho, Măt trâ̆n tơnêi têa Việt Nam ƀă mâu khu tơrŭm cheăng kal kí thế hbrâ rơnáu pơtối pêi hnoăng cheăng séa ngăn tối tro tơdroăng veăng hnê tối tung mơjiâng Đảng, mơjiâng mâu kăn pơkuâ, mơjiâng khu kăn ƀô̆ đảng viên tung pơkâ thế pêi tro hnoăng cheăng châ pơcháu.

-Tung pơla dế ai pơreăng kân COVID-19 tâ tú rơ-iô, vâ tơniăn hlối hbrâ mơdât pơreăng châ tơ-ƀrê hlối mơnhông cheăng kâ - rêh ối ƀă châ pêi tro tiô Pơkâ Hneăng hôp Đảng rêm râ hiăng tơbleăng, Kăn hnê ngăn Đảng kong pơlê, Khu kăn hnê ngăn Đảng kong pơlê Dak Lak hiăng ai troăng rơhlâ pơkâ, hnê mơhno ti lâi tung la ngiâ ô pôa?

Pôa Nguyễn Đình Trung: Hơnăm 2022 tối tơbelăng hdrối tơdroăng pơreăng xuân ối tâ tú rơ-iô. Xua mê, Khu pơkuâ cheăng Đảng kong pơlê hiăng pơkâ hnê mơhno kơxô̆ 16 ‘na tơdroăng hnê mơhno hbrâ mơdât pơreăng COVID-19 tung pơla nếo nôkố vâ mâu kăn hnê mơhno tŭm tơdroăng kal kí mâu tơdroăng cheăng hbrâ mơdât pơreăng. Tung mê ai tối nhên mâu tơdroăng cheăng ki kal kơ’nâi kố:

-Má môi, cho thế séa ngăn tơdroăng pơreăng tâ tú vâ teăm hnê mơhno, hnê pêi mâu tơdroăng ki kal, tơtro pôi tá ăm châ tơngôu, pôi kơdrâ, pôi tá lối hâ ho a rêm  tíu khăm pơlâ.

-Má péa, thế mơdêk hnoăng cheăng hnê mơhno tung hyôh rơ’jiu hlá tơbeăng um tơvi vâ mơdêk ăm kuăn pơlê hlê plĕng tung hbrâ mơdât pơreăng COVID-19.

Má pái, cho tơkŭm hnê mơhno mâu khu kăn Đảng tơring, khu kăn Đảng pơlê kong kơdrâm ƀă đảng viên dêi tíu pêi cheăng, mâu kơ koan hbrâ pơkâ mâu troăng rơhlâ pro tơniăn vâ mơdât pơreăng. Malối cho tung rôh leh, Têt Lo hơnăm nếo Nhâm Dần.

Má pŭn, pơtối tơmâng hnê pêi kơtăng Pơkâ kơxô̆ 128 dêi Chin phuh ƀă pơkâ dêi khu xiâm ngăn pơkeăng pơlât Têt xuân môi tiah Vi ƀan kong pơlê tung mê khĕn kơdeăn tro, teăm tơdrêng rêm râ ‘na  pơreăng vâ xuá mâu pơkâ ki tơ-tro ƀă tơdroăng tâ tú pơreăng. Pro tơniăn hlối pêi tro mâu tơdroăng hbrâ mơdât pơreăng hlối mơnhông cheăng kâ rêh ối dêi kong pơlê.

-Mơnê kô pôa!

Hương Lý chêh

Gương tơplôu ƀă tơbleăng