Roh Kơ-óu kơphế Việt Nam kô tơkŭm po a hâi lơ 10/3/2025, tơbleăng tơdroăng châ tơƀrê ƀă diâp pri a hâi lơ 13/3/2025, tro roh tơkŭm po Leh tơbleăng kơphế Ƀuôn Ma Thuột má 9. Ngế ki veăng roh tơ’noăng cho kuăn pơlê Việt Nam sap ing 18 hơnăm tơngi klêng, dế rêh ối ƀă pêi cheăng tung tơnêi têa Việt Nam. Mâu hok tro kô châ tơ’noăng mâu tơdroăng, mê cho: châ ăm kloăng kơphế vâ kơ-óu; pơtâp xúa kơmăi kơ-óu; nâp hlá mơ-éa chêh tối ‘na túa kơ-óu ƀă chêh tối ki xú hŏm dêi kơphế; túa kơ-óu...

Pôa Trịnh Đức Minh - Kăn hnê ngăn Khu tơrŭm Kơphế Ƀuôn Ma Thuột tối ăm ‘nâi, kong pơlê Dak Lak dế mơ-eăm mơnhông Ƀuôn Ma Thuột chiâng pơlê kong kơdrâm kơphế dêi lâp plâi tơnêi, pakĭng tơdroăng mơnhên ‘na ki kân ƀăng deăng, tơmeăm pêi lo mê dâi lĕm, ki xú hŏm lĕm dêi kơphế klêi kơ’nâi uâ mơdiê châ tơmâng vâ ‘nâi nhên. Ing ki tơƀrê dêi roh tơ’noăng má môi, a roh tơ’noăng hơnăm kố, Khu tơrŭm pơtối ai hên pơhlêh nếo vâ mâu ngế ki kơ-óu ai roh mơhno dêi tuăn ngôa, kŏng pêi rơkê dêi tơná.

Tơdrêng amê, mơjiâng mâu tơpoăng kơphế ki uâ dâi lĕm, ki pơ-ô tơdroăng kơnía nếo dêi kơphế tung túa kơ-óu. Pôa Trịnh Đức Minh ai tối ăm ‘nâi:

“Roh tơ’noăng hơnăm kố ‘na ki pakong, ‘na tơdroăng tơkŭm po kân tâ, rơdâ tâ, djâ tơdroăng tơdjuôm pơlê pơla hên tâ. Má péa, châm điêm kơ’lo kơphế châ châm tiô ƀiêuh mauh nếo tiô tơdroăng pơkâ dêi SCA (Khu tơrŭm mơjiâng Kơphế xú hŏm Lâp plâi tơnêi) ƀă CQI (Kơ koan xiâm Dâi lĕm Kơphế - a Mih). Má 3, krếo mâu ngế ki rơkê kong têa ê troh mơnhên ki dâi lĕm kơphế djâ ki trâu hơngế ‘nâi plĕng nhên ‘na kơphế vâ mơhnhôk mâu ngế hâk vâ kơphế troh ƀă tíu ki pêi pêt, mơjiâng hên kơphế’’.

Việt Nam hiăng djâ troăng ahdrối ‘na kơphế Robusta xú hŏm dêi lâp plâi tơnêi mê xuân thế ai mâu ngế ki kơ-óu kơphế rơkê má môi lâp plâi tơnêi. Kố cho pói vâ dêi khu râ kăn pơkuâ Khu tơrŭm Kơphế Ƀuôn Ma Thuột, tíu pơkuâ roh tơ’noăng Kơ-óu kơphế Việt Nam 2025. Klêi kơ’nâi 2 khế mơhnhôk pêi pro, roh tơ’noăng ƀă hiăng châ tơdah tơdroăng dêi 36 ngế lo ing 13 kong pơlê ƀă pơlê kong kơdrâm kĭ veăng tơ’noăng, tung mê, kong pơlê Dak Lak ƀă Pơlê kong kân Hồ Chí Minh ai kơdrâm ngế chêh - kĭ dêi inâi veăng tơ’noăng.

Drăng ki phá dêi roh tơ’noăng kố tâng pơchông ƀă mâu roh tơ’noăng kơ-óu kơphế lâp plâi tơnêi cho xúa kơphế Arabica ƀă Robusta Việt Nam. Ngế tơ’noăng thế rơkê kơ-óu tiô túa (Phuôr Ôu-vơr) Pour Over (túa hơ’lâk, tơvât ƀă kŏng gum bro xú pơ-ou lĕm dêi kơphế) ƀă tơdroăng kơhleăng bro ƀă phin. Rơtế amê, thế chiâng rơkê 3 tơdroăng: mơnhên ki dâi lĕm kloăng kơphế, kơ-óu ƀă tơvât kơphế. Tung mê, tơtrŏng má môi cho châm điêm kơ’lo kơphế kô châ châm tiô troăng ki nếo tiô pơkâ dêi SCA Khu tơrŭm pro kơphế xú hŏm má môi lâp plâi tơnêi) ƀă CQI (Kơ koan xiâm ki ngăn tơdroăng dâi lĕm Kơphế - a kong têa Mih)

Tiô pôa Lê Đức Huy, Phŏ Kăn hnê ngăn Khu tơrŭm pêt mơjiâng kơphế Ƀuôn Ma Thuột tối, roh tơ’noăng Kơ-óu kơphế Việt Nam ôh tá xê to tíu tơkŭm mâu ngế hâk vâ, tá hiâm mơno ƀă kơphế vâ tối dêi pó túa ki rơkê tơtro, mơjiâng tíu tơdjêp ai ivá mơhnhôk, troh lâp lu tơdroăng ki hâk vâ ‘na kơphế mê ối cho troăng prôk mơdêk ki kơnía dêi kơphế Việt Nam. Pôa Lê Đức Huy tối ăm ‘nâi:

‘’Vâ mơnhông tơniăn kơchơ tê mơdró ôh tá xê to pin mơnhông tơdroăng pêt mơjiâng mê thế mơnhông tơdroăng kal vâ. Việt Nam hiăng mơnhên dêi tơná cho tơnêi têa pêt mơjiâng kơphế Robusta kân má môi dêi lâp plâi tơnêi ƀă pin hiăng djâ troăng ahdrối ‘na kơphế Robusta kxú hŏm dêi lâp plâi tơnêi mê pin xuân thế ai mâu ngế ki kơ-óu kơphế rơkê má môi tung lâp plâi tơnêi’’.

Kô chiâng vâ tối, roh tơ’noăng Kơ-óu Kơphế Việt Nam 2025 cho môi tơdroăng ki kal khât ƀă kơnía, mơdêk tơdroăng mơnhông dêi kơvâ kơphế tiô troăng rơkê ƀă tơniăn ton. Ôh tá ôh tá xê to roh tơ’lêi vâ pơ-ôu pơ-eăng mâu ngế ki kơ-óu ki rơkê mê ối cho môi troăng prôk ki kal tung hnoăng pêi pro mơdêk ki kơnía dêi kơphế Việt Nam.

Pakĭng roh tơ’noăng Kơ-óu kơphế, tung tơdroăng po Leh tơbleăng kơphế Ƀuôn Ma Thuột má 9 hơnăm 2025, Khu tơrŭm pêt mơjiâng kơphế Ƀuôn Ma Thuột ối tơkŭm po tơ’nôm mâu tơdroăng vâ mơhnhôk tơmối troh mot ngăn, môi tiah: Roh tơ’noăng (Di Or Dơ Mếi-yìng Khop 2025) The Art Amazing Cup 2025 ăm mâu pú hmâ hâk vâ cheăng tơvât kơphế ngê̆ thuât, a hâi lơ 11/3 ƀă Talkshow ƀă dó inâi ‘’Ƀuôn Ma Thuột tíu troh dêi kơphế Lâp plâi tơnêi’’ ƀă hên ngế ki xông tơpui tối rơkê loi tơngah khât.