Riân troh tâi hâi lơ 20/2/2025, lâp kong pơlê Kon Tum hiăng gum tah lôi 627 hngêi pơtân, hngêi xi kơchoh, tung mê, mơjiâng pro nếo 508 toăng hngêi ƀă ‘mâi rơnêu 119 toăng hngêi ăm kuăn pơlê. Tiah mê, pơchông ngăn ƀă măng tĭng hdrối hiăng ai tơ’nôm 105 rơpŏng a kong pơlê Kon Tum hiăng châ gum tah lôi hngêi pơtân, hngêi xi drêng mêi, tô trâ drêng kong tô, tung mê a tơring Đăk Glei ai 38 toăng hngêi ƀă tơring Đăk Hà ai 31 toăng hngêi.

Tiô tơdroăng ăm ‘nâi ing Khu hnê ngăn ‘na gum tah hngêi pơtân, hngêi xi kơchoh drêng ai mêi, cheăng tung Khu pơkuâ hnê ngăn Đảng kong pơlê Kon Tum ăm ‘nâi, lâp kong pơlê kố ai 2.752 toăng hngêi pơtân, hngêi xi kơchoh, tung mê kơxô̆ hngêi ki châ gum mơjiâng pro nếo ai 2.186 ƀă ‘mâi rơnêu ai 566 toăng hngêi. 3 tơring dêi kong pơlê Kon Tum ki ai mâu hngêi pơtân, hngêi tơ’nhiê, hngêi xo kơchoh drêng ai mêi, tro tô drêng kong tô kal châ mơjiâng nếo, ‘mâi rơnêu, tung mê ai: Đăk Glêi 646 toăng, Kon Plông 572 toăng ƀă Tu Mrông 423 toăng.

Vâ rĕng pêi pro klêi tơdroăng gum tah hngêi pơtân, hngêi xi kơchoh tiô tơdroăng pơkâ thế dêi Chin phuh, kong pơlê Kon Tum mơnhnhôk ivá cheăng ing mâu khu râ, mâu ngế krê tung kong pơlê, ƀă kong pơlê ê, tơdrêng amê, hnối pêi tơrŭm ƀă mâu tơdroăng cheăng, tơdroăng tơkêa bro vâ gum ăm kuăn pơlê tah lôi hngêi pơtân, hngêi tơ’nhiê, hngêi xi kơdoh drêng ai mêi, tô trâ drêng ai kong tô.