VOV4.Xơ Đăng - A kơpong Tây Nguyên dế hbrâ vâ mot tung rơnó mê hngê, rơnó rơvât phon ăm mâu hdrê loăng pêt. Dế nôkố, rơtế ƀă yă tê phon rơvât dế ối kơnâ ó, a kong pơlê Kon Tum mơngế pêt kơphế a tơring Đăk Hà ối châ trâm hlo hên mâu kơxâk phon ki tối cho dâi ó khât, cho phon sinh hok An Thái la ôh tá tŭm ki hngăm ga.

Ahdrối Têt Lo hơnăm nếo Nhâm dần 2022, ngoh Nguyễn Văn Trung, hngêi ối a tôh kơphô̆ 2B, pơlê kân Đăk Hà, tơring Đăk Hà, kong pơlê Kon Tum cho kŏng nhân Kŏng ti pêi cheăng tiô rơnó môi khu kơphế 731, ối tung Kŏng ti kơphế Việt Nam tơdah xo hdrối dêi Kŏng ti 20 kơxâk phon ki dâi lĕm sinh hok An Thái NPK, ki hngăm rêm kơxâk 50 kilô vâ rơvât ăm xiâm loăng kơphế. Tơdroăng djâ xui mâu kơxâk, tâ hiâ tâ tiah hmâ ngoh djâ kâng mê châ hlo mâu kơxâk pơrá ôh tá tŭm kg tâng pơchông ƀă tơdroăng chêh tơbleăng a kơxâk:

‘’Á xo kơxô̆ phon kố ing Kŏng ti pêi cheăng tiô rơnó môi khu kơphế 731. Á tơdah xo vêh djâ a hngêi mê dâng 26, 27 Têt. Á pêi chiâk deăng á xui tâ hiâ mê á xuân tối mơni ôh tá tŭm kg mê djâ mơnúa kâng. Mê hlo ôh tá ôh tŭm kâng mê á xuân ai tơbleăng ƀă kăn pơkuâ dêi khu pêt mơjiâng tơmeăm khoăng’’.

Ngoh Nguyễn Văn Trang, ngế châ hlo mâu kơxâk phon ôh tá tŭm kĭ

Ing châ hlo kơxâk phon ôh tá tŭm kg dêi ngoh Nguyễn Văn Trung, hên kŏng nhân ki ê xuân tơdah xo hdrối phon ing Kŏng ti pêi cheăng tiô rơnó môi khu kơphế 731 hiăng vêh kâng séa ngăn. Ngoh Bùi Đình Kiên, hngêi ối a Tôh kơphô̆ 2A, pơlê kân Đăk Hà, tơring Đăk Hà, tối ăm ‘nâi:

‘’Rơpŏng á xo châ 10 kơxâk 5 tă, ŏng á mê xo troh 1 tâ̆n. Kâng tâi tâng hlo ki hngăm ôh tá tŭm dâng 1 troh 1,5 kilô. Ngin pêi lo pơ’leăng kơphế cho pá puât, tơbrê rơbrêh. 2 kilô kơphế ôh tá châ vâ rôe môi kilô phon tơdrêng amê phon nôkố ki rơhêng vâ tối ‘na ki ôh tá tŭm tá hâi khên tối troh ki dâi lĕm lơ ôh’’.

Tơmâng xo rơkong tơpui tối ‘na tơdroăng mâu kơxâk phon dâi lĕm sinh hok An Thái NPK xo hdrối ăm kŏng nhân mâu Khu mơjiâng pro ôh tá tŭm kâng, khu râ kăn pơkuâ Kŏng ti pêi cheăng tiô rơnó Kơphế 731 hiăng ăm séa ngăn, mơnhên rêm kơxâk pơrá ôh tá tŭm 1,2 kilô ôh tá tro ƀă tơdroăng chêh tơbleăng a kơxâk ƀă tơkêa. Pôa Nguyễn Hữu Tư, Kăn phŏ pơkuâ Kŏng ti tối ăm ‘nâi, kơxô̆ phon kố Kŏng ti hiăng rôe 2.256 kơxâk ing tíu ki tê cho Kŏng ti pêi cheăng tiô rơnó môi khu xúa kơmăi kơmok rơxông nếo SVD ai tíu pêi cheăng a pơlê kong kơdrâm Kon Tum vâ xing xoăng ăm kŏng nhân. Tơdroăng pêi cheăng ƀă Kŏng ti pêi cheăng tiô rơnó môi khu Kơphế 731, kăn teăng mâ tíu ki pơtroh ăm phon cho pôa Lê Quang Dũng, Kăn hnê ngăn xuân cho kăn pơkuâ hiăng tối mơnhên tối cho ai tơdroăng ki ôh tá tŭm kg dêi rêm kơxâk phon ƀă tối cho xua xôi ing troăng kơmăi tâ tung kơxâk. ‘Na troăng vâ pơxâu phak kơxô̆ phon ôh tá tŭm kg, pôa Nguyễn Hữu Tư mơnhên tối, kŏng ti hiăng tơdah pôu râng hnoăng cheăng:

‘’Ngoh Dũng ki má môi kô pôu râng hnoăng cheăng kơdroh kơxô̆ phon mê ăm mơngế pêi cheăng. Má péa ngoh ối tâng pâ pôi  tá ‘nhó tâi tâng kăn ƀô̆ kŏng nhân viên ƀă mơngế pêi cheăng Kŏng ti kơphế’’.

Môi kơxâk phon ki lĕm sinh hok An Thái NPK ôh tá tŭm kĭ

Ti tăng plĕng châ ‘nâi hiăng ai ki vâ iâ 3 hơnăm Kŏng ti pêi cheăng tiô rơnó môi khu kơphế 731 ối tung Kŏng ti xiâm Kơphế Việt Nam a tơring Đăk Hà, kong pơlê Kon Tum tơkêa rôe phon dâi lĕm sinh hok An Thái NPK ƀă Kŏng ti pêi cheăng tiô rơnó môi khu xúa kơmăi kơmok rơxông nếo SVD ăm kŏng nhân vâ rơvât phon ăm xiâm loăng kơphế. Tơdroăng chêh a kơxâk phon lĕm sinh hok An Thái NPK ôh tá tŭm kĭ ăm hlo, phon rơvât châ xúa ăm mâu loăng plâi ƀă châ mơjiâng xua Kŏng ti pêi cheăng tiô rơnó Kơmăi kơmok rơxông nếo hưh cơ sinh hok An Thái, a Lô C4B, kơpong hngêi kơmăi kơmok Hòa Bình, pơlê kong kơdrâm Kon Tum, kong pơlê Kon Tum.

A Sa Ly tơplôu ƀă tơbleăng