Tung lâp kong pơlê Kon Tum hiăng mơgêi tơdroăng cheăng dêi 7 Đảng, Đoân; 3 Khu pơkuâ ngăn cheăng Đảng ƀă mơgêi tơdroăng cheăng dêi Đảng ủi Khô̆i kơ koan ƀă Khu mơdró kâ kong pơlê vâ mơjiâng Đảng ủi mâu kơ koan Đảng ối tung Khu pơkuâ ngăn Đảng kong pơlê ƀă Đảng ủi Vi ƀan hnê ngăn kong pơlê.

Ƀă mâu tíu cheăng, kơvâ cheăng, sap ing 20 kơ koan xiâm ối tung Vi ƀan hnê ngăn kong pơlê, kong pơlê Kon Tum ‘mot tơkŭm ối 14 tíu cheăng, tung mê mơjiâng nếo Khu ngăn hdroâng kuăn ngo ƀă Tơdroăng loi tĭng tiô khô̆i. Kong pơlê ‘mot tơkŭm Hlá tơbeăng Kon Tum ƀă Rơ’jiu – Um tơvi kong pơlê xo inâi nếo cho Tíu xiâm mơ’no tơdroăng kal kong pơlê Kon Tum.

Pakĭng mê ối tơkŭm sap ing 16 Hô̆i châ Tơnêi têa pơcháu hnoăng ki u ối cho 10 Hô̆i. A râ tơring, rơtế ƀă pêi pro ‘mot tơkŭm Khu pơtâng tối tơdroăng kal ƀă Hnê mơhnhôk cheăng Đảng tơring, mâu kơ koan cheăng ối tung Vi ƀan hnê ngăn râ tơring ‘mot tơkŭm sap ing 13 tíu cheăng xiâm ki u ối 11 tíu cheăng.