VOV4.XơĐăng - A kong pơlê Kon Tum tung pơla kố nah pơreăng COVID-19 hiăng pro hên ngế pêi cheăng mơngế hdroâng kuăn ngo thế pơtê tơdroăng cheăng, hía tơdroăng cheăng ƀă pá vâ tăng cheăng pêi. Kâi trâng ƀă pơreăng xông tâ tú, mâu kơ koan cheăng dêi kong pơlê Kon Tum dế thăm pêi pro tơdroăng tơbleăng, hnê mơhno kum mơngế pêi cheăng ti tăng châ tơdroăng cheăng pêi, tơniăn tơdroăng rêh ối ƀă kêi đeăng pơkâ mơ’no tung hơnăm kố, cho tăng cheăng pêi ăm 6.200 ngế pêi cheăng ki hên cho mơngế hdroâng kuăn ngo.

Châ tơkŭm po a môi hâi mơ’nui khế 2 kô nah, hâi kơ êng tối, tơbleăng cheăng pêi, hriâm cheăng pêi hơnăm 2022 xua Khu xiâm ngăn ‘na tăng cheăng pêi kong pơlê Kon Tum pơkuâ a cheăng Sa Nghiã, tơring Sa Thầy tơ’mot vâ chê 100 ngế a kong pơlê vâ pêi cheăng. Pôa A Trân, hngêi a pơlê Đăk Tân ăm ‘nâi, drêng pơreăng COVID-19 tâ tú ó, ngế kuăn rơmúa dêi pôa cheăng  kŏng nhân a kong pơlê Bình Dương pơtê cheăng vêh a pơlê. Nôkố kuăn má 2 hiăng châ 18 hơnăm, pôa ối kal tăng cheăng pêi ăm dêi kuăn:

 ‘’Rơpŏng hngêi a pêt 1 rơpâu xiâm kơphế. Ai 7 ngế kuăn xuân xơpá khât. Púi vâ to lâi ngế kuăn a mê châ lăm pêi cheăng vâ tăng tơ’môm liăn. Púi vâ khu mơdró veăng kum ăm ai hngêi ối pơtê, ai rơxế to lăm pêi cheăng. Má péa  nếo mơhá liăn khế kâ ăm chiá hên iâ ’’.

Tơbleăng mơhno cheăng pêi a kong pơlê ki ê ăm mơngế ki vâ lăm pêi cheăng

Troh hâi kơ êng  tơhmâ hnê cheăng, nâ Y Hương xuân môi tiah mâu ngế pêi cheăng ki ê tung cheăm Sa Nghiã xuân púi vâ châ tăng tơdroăng cheăng pêi tơtro, ai kơxô̆ liăn pê lo tơniăn vâ pơ’lêh tơdroăng rêh ối:

 ‘’Rơpŏng hngêi pêt kơphế ai 3 sao, nôkố dế trâm pá ‘nâng. Kơnôm tíu tí tăng tơbleăng tơdroăng cheăng pêi tơbleăng ăm mâu tơdroăng cheăng pêi vâ châ tơniăn. Tâng lơ ai vâ tơdroăng cheăng pêi tung kong pơlê, pêi cheăng hơngế pâ ‘nâng’’.

Tung pơla hdrối kô nah, hên khu mơdró  hiăng pơtroh hlá mơ-éa troh Khu xiâm ngăn cheăng pêi, Mố đô̆i tro rong  ƀă rêh ối pơlê pơla kong pơlê Kon Tum kơnôm tŏng kum rah tăng cheăng pêi ƀă tâi tâng kơxô̆ mơngế pêi cheăng lối 10 rơpâu ngế. A tung kong pơlê tơdroăng kal vâ  ai mơngế pêi cheăng dêi mâu khu mơdró xuân tâk hên. Laga xua hên kơxô̆ mơngế kal pêi cheăng mê to mâu hdroâng kuăn ngo mê thế rah tăng khu mơdró ki ai tơdroăng kal vâ ăm vâi pêi cheăng, luât pơkâ tŏng kum tơtro há vâ mơhno tơbleăng ƀă tơkŭm po hnê hriâm, vâ hlê mâu tơdroăng cheăng pêi ăm mơngế ki pêi cheăng. Jâ Nguyễn Thị Nga, Ngế pơkuâ  Tíu xiâm tăng cheăng pêi kong pơlê Kon Tum tối:

Hnê tối tơleăng tơdroăng cheăng pêi ăm mơngế pêi cheăng cho mâu  kuăn ngo

“Hdrối vâ djâ mơngế lăm pêi cheăng a mâu kong pơlê mê hnê tối, hnê ăm vâi hlê mâu tơdroăng cheăng, hnê túa pêi cheăng ma lối hnê tơdroăng tơpui  tơno a tíu pêi cheăng. Tơpui drêng rêh ối pú hên. Túa pêi cheăng a hngêi kơmăi. Tơbleăng ăm kuăn pơlê hlê luât pơkâ tŏng kum, hnoăng ki pơxúa, hnoăng cheăng  pêi drêng lăm pêi cheăng a mâu Khu mơdró. Malối cho pêi cheăng a mâu Tíu tăng cheăng pêi dêi kong pơlê pú xuân môi tiah mâu khu mơdró vâ tăng mơhno tíu ăm ối kâ vâ tơniăn ăm kuăn pơlê’’.

Tơdrêng ƀă tơdroăng kum mơngế pêi cheăng tăng cheăng pêi, nôkố mâu kơ koan khu râ pơkuâ cheăng dêi kong pơlê Kon Tum xuân dế pơtối rak vế mâu luât pơkâ vâ tŏng kum, mơhnhôk, mơngế pêi cheăng, môi tiah; tŏng kum liăn test COVID-19; kum liăn rơxế, liăn kâ ôu drô troăng ƀă rah ngế hnê djâ mơngế lăm pêi cheăng chiên vâ troh a tíu pêi cheăng. Tung pơla mơngế pêi cheăng dế cheăng a mâu tíu, a khu mơdró pá gong kong pơlê, kơ koan khu râ pơkuâ cheăng dêi kong pơlê Kon Tum  xuân đi đo tơpui ƀă mây ngế pêi cheăng vâ ‘nâi plê̆ng mâu tơdroăng  ki vâi pêi cheăng, hlối tŏng kum teăm tơdrêng ăm mơngế pêi cheăng drêng vâi châi tamo lơ drêng vâi ai tơdroăng kal tung rơpŏng hngêi .

Khoa Điềm chêh

Gương tơplôu ƀă tơbleăng