VOV4.Xơ Đăng - A kong pơlê Kon Tum hên tơdroăng cheăng pêi pro tŏng kumTêt ăm kuăn pơlê dế châ tơbleăng pêi pro. Vi ƀan hnê ngăn kong pơlê xuân hiăng pơkâ ‘na kơlo kum ăm rơpŏng ối tung rơpŏng kơtiê vâ chê kơtiê tơdah Têt Lo hơnăm nếo Nhâm Dần 2022. Tiah mê, tâi tâng kơxô̆ liăn ki kong pơlê Kon Tum kum ăm mâu rơpŏng kơtiê rơpŏng vâ chê kơtiê tơdah Têt Lo hơnăm nếo Nhâm Dần 2022 cho vâ chê 16 rơtal liăn.

Tíu tơkăng kong Kon Tum diâp liăn hriâm rơkê ăm hok tro ki ai tơdroăng rêh ối xơpá a cheăm Đak Plô, tơring Đăk Glei

Tung mê kơlo tŏng kum ƀă mâu rơpŏng kơtiê ai 600 rơpâu liăn ƀă mâu rơpŏng vâ chê kơtiê ai 300 rơpâu liăn. A kong pơlê Kon Tum tung mâu hâi ki kố mê xuân dế po hên tơdroăng cheăng ki tŏng kum Têt ăm kuăn pơlê, malối cho kuăn pơlê a kơpong hngếm hngo kơpong tíu tơkăng kong. Troh hâi kố lối rơpâu hnoăng tơmeăm Têt hiăng châ hbru troh a kŏng dêi mâu rơpŏng ki châ tŏng kum lơ mâu vâi o hok tro ki ai tơdroăng rêh ối xơpá.

Mâu tơdroăng môi tiah: “Hơngui a tíu tơkăng kong hơtô hiâm mơno kuăn pơlê”, “Rơtế ƀă vâi kơdrâi a tíu tơkăng kong”, “Hâi mơdĭng kơ-ƀăn chưng ngiât” ƀă hên tơdroăng ki ê châ tơkŭm po sap ing nôkố troh mâu hâi ki a chê Têt djâ tơvế tơdroăng ki hơniâp ro Têt pâ nhuô̆m ăm rêm ngế.

Katarina Nga tơplôu ƀă tơbleăng