Tiô tơdroăng ki mơnhên tối dêi Khu tơrŭm mơdró kâ ƀă cheăng kơmăi kơmok Việt Nam, hnoăng cheăng  ki hơ’lêh chêh bro hlá mơ-eá. pro tơ’lêi hlâu tung tơdroăng mơ’no liăn vâ mơdró kâ dêi kong pơlê Kon Tum tung mâu khế hơnăm hdrối mê hía nah châ tơƀrê, tơhluâ, pơxúa păng ‘nâng.

Ki xiâm dêi tơdroăng mê, kơlo ki tơbriât tê mơdró dêi râ kong pơlê tâk troh a 24, tơkéa vâ tối a kơlo 37 tung 63 to kong  pơlê, pơlê kong kân; Kơlo ki tơbriât hlâu dêi kong pơlê ối má 26 tung 63 kong pơlê, pơlê kong kân; Kơlo ki ‘mâi rơnêu bro túa chêh bro hlá mơ-eá, pro tơ’lêi hlâu ăm khu mơdró kâ mơ’no liăn cheăng hiăng châ pêi pro troh a kơlo ki a’ngêi, ki xiâm má môi dêi tơdroăng pêi pro mê cho athế ƀlêi chiâng tung mâu kơvâ cheăng, kơlo ki mơnhông pêi cheăng kâ - rêh ối pơlê pơla sap ing hơnăm 2020-2025.

A roh hôp pôa Lê Ngọc Tuấn, Kăn xiâm hnê ngăn Vi ƀan kong pơlê Kon Tum hiăng pơkâ pêi pro 6 tơdroăng cheăng vâ tah lôi ki tơvâ tơvân, xahpá, tung mê, mơjiâng troăng prôk ki vâ kum tơ’lêi hlâu ăm kuăn pơlê, khu mơdró kâ, thăm mơdêk hnoăng cheăng, túa pêi pro vâ tơbriât tung mơnhông pêi cheăng kâ - rêh ối pơlê pơla; seá mơnhên ngăn, pâ thế kơdroh, pro tơ’lêi hlâu mâu tơdroăng pơkâ ai tơdjâk troh tơdroăng mơ’no liăn cheăng mơjiâng pro tơmeăm khoăng, mơ’no liăn tê mơdró kâ.