Hlo ti mê mâu khu râ pơkuâ cheăng dêi kong pơlê dế mơdêk hnê rak ngăn kong krâu khât. Tơdroăng tối ăm ‘nâi ing Khu xiâm rak ngăn kong dêi kong dêi kong pơlê Kon Tum ăm hlo, a mâu tơring dế châ mơdêk hnoăng cheăng vâ tơbriât rak ngăn cho Ia H'Drai, Sa Thầy, Đăk Tô, Ngọc Hồi, Đăk Hà, Kon Rẫy, Đăk Glei, Tu Mơ Rông ƀă pơlê kong kơdrâm Kon Tum, ăm ‘nâi hdrối ‘na on chếo kong hên túa cho râ 5, cho râ ki rơ-iô ó mơni kô chếo kân a tâi tâng mâu ƀăng kong.

Pôa Nguyễn Văn Nam, Kăn xiâm hnê ngăn khu rak ngăn kong  dêi kong pơlê Kon Tum ăm ‘nâi, vâ mơdât on chếo kong mê 14 tíu pêi cheăng rak ngăn kong, cho 7 kŏng ti, 7 Khu rak ngăn kong rak kơnhŏng têa, rak ngăn kong kân ƀă mâu kăn dêi 10 tơring, pơlê kong kơdrâm tung kong pơlê hiăng mơdêk tăng mơngế gak ngăn; ngăn kơtăng mâu ngế ki lâi mot tung kong ƀă séa ngăn xiâm kối on vâ hbrâ mơdât.