VOV4.Xơ Đăng - Pêi pro tơdroăng pơkâ dêi tơnêi têa “Rêm cheăm môi tơmeăm” OCOP, hơnăm 2021 kong pơlê Kon Tum hiăng mơjiâng châ 58 to kế tơmeăm mơdêk kơxô̆ kế tơmeăm OCOP dêi kong pơlê tâk troh 146 to kế tơmeăm ƀă pơrá châ sap ing 3 troh 4 to hơlŏng. Ôh ti xê to tiah mê, sap ing rôh ki xơpá, tơdjâk dêi pơreăng COVID-19, mâu khu tơrŭm dêi kế tơmeăm OCOP, kơvâ cheăng ki ai tơdjâk troh kong pơlê Kon Tum hiăng ai hên tơdroăng ki tơchĕng tơmiât rơkê plĕng tung tơdjêp, tê kế tơmeăm troh a kŏng kuăn pơlê châ ki kơnía veăng kum hơ’lêh tơdroăng rêh ối a thôn pơlê.

Cheăm Đăk Pxi, tơring Đăk Hà, kong pơlê Kon Tum ô eăng ƀă tơmeăm OCOP tơpăng pơlái têng khăng. Hơnăm 2021 kuăn pơlê tung cheăm lăm tăng, pro châ dâng 12 tâ̆n tơpăng pơlái têng khăng, tê tung kơchơ tê mơdró. Tung pơla pơreăng COVID-19 xông tâ tú ó, tơmeăm OCOP tơpăng pơlái khăng dêi cheăm Đăk Pxi xuân châ mơngế rôe xúa hâk vâ rôe.

Ngoh A Sáo, pơlê Kon Pao Kla, tối ăm ‘nâi, kơnôm veăng mơjiâng pro tơmeăm OCOP mơdêk châ ki kơnâ, kuăn pơlê châ tơ’nôm pêi lo liăn pơ’lêh tơdroăng rêh ối ing mê, rế pro ăm tơmeăm tơná lĕm tâ mê nếo:

“Pơxiâm sap khế 7 kuăn pơlê lăm tung kong đôu tơpăng pơlái. Kuăn pơlê klêa têng khăng. Vâ ai tơpăng krúa, lĕm dâi, tê ngi kong têa ê klêi kơ’nâi đôu xo tơpăng kal rĕng lêa kơtôu tơpăng ƀă thế âp tơdrêng mê hlối. Klêi mê xo kơ‘nhâm tung têa hngíu, krúa lĕm, klêa ku kŭn têng a kong tô lơ têng ƀă kơchâ.

Ahdrối vâ kơxuô tơpăng mê thế rah tah lôi mâu tơpăng ki ‘mêi, rah mâu tơpăng ki lĕm má môi mê mơngế rôe nếo hâk vâ, kâ nếo kơhiâm. Kuăn pơlê pêi lo liăn ing tơpăng pơlái rế hâk ti tăng pro, thăm pôu râng hnoăng tâ’’.

Mơnhông mơdêk kơpong pêt pơkeăng vâ mơjiâng pro tơmeăm OCOP a tơring Đăk Tô

Hơnăm 2021 tung pơla pơreăng COVID-19 xông tâ tú, mâu khu tê mơdró, khu tơrŭm cheăng, rơpŏng tê mơdró dêi kong pơlê Kon Tum xuân mơjiâng châ 58 tơmeăm OCOP ƀă klêa bro a pơlê. Tung mê, má môi cho khu tơmeăm pro ing sâm Ngọc Linh, kơphế, sâm kơxái, plâi kâ ƀă hía hé. Nâ Hồ Thị Kim Oanh, Kăn pơkuâ Kŏng ti pêi cheăng tiô rơnó tê mơdró – pêt mơjiâng ƀă ôm hyô Lâm Thịnh, a tơring Đăk Tô tối ăm ‘nâi, khu tê mơdró hiăng mơjiâng châ tơmeăm chế sâm kơxái Ngọc Linh châ râ 3 hơlŏng ƀă dế pơtối kêi đeăng tơdroăng mơjiâng pro mâu tơmeăm ki ê.

“Kŏng ti nếo veăng tung tơdroăng OCOP. Drêng lo a kơchơ tê mơdró ‘na ivá tơbriât cheăng tê mơdró tâng pơchông ƀă mâu tơmeăm ki ê mê vâi hiăng tê mơdró ton, tâng pơchông mê pin ối thu hơngế. Klêi kơ’nâi 2 hơnăm veăng tung tơdroăng OCOP tơmeăm hiăng châ pro lĕm tâ hên. ‘Na tơdroăng tê mơdró tâk ki vâ iâ má môi cho 50% ‘na ivá tơbriêt cheăng, ‘na ki liá tâ klêi mê ki dâi lĕm. Drêng tơbleăng a mâu tíu tê mơdró điê̆n tưh Shopee mê tơmeăm ngin xuân ôh tá thu mâu tơmeăm ki ê’’.

Môi tíu tơbleăng tơmeăm OCOP a pơlê kong kân Kon Tum

Xêo troh hơnăm 2021, kong pơlê Kon Tum hiăng mơjiâng châ 146 tơmeăm OCOP ối râ sap ing 3 troh 5 hơlŏng. Vâ mơnhên inâi, mơdêk ki kơnâ tơmeăm, tơdroăng tơdjêp kơchơ tê mơdró châ tơmâng tơtrŏng. Tung pơla pơreăng COVID-19 xông tâ tú, mâu khu pơkuâ dêi mâu tơmeăm OCOP rĕng pơ’lêh troăng tiô troăng tê mơdró tung điê̆n tưh môi tiah rôe tơmeăm Lazada, Shopee, Sendo, Tiki.

Jâ Lương Thị Mỹ Huệ, Kăn pơkuâ Kŏng ti pêi cheăng tiô rơnó môi khu pơkeăng Tây Nguyên, mơnhên khu tê mơdró hiăng châ tơƀrê kơnôm pơ’lêh troăng pêi teăm tơdrêng:

“Ôh tá châ pêi pro mâu tơdroăng rĕng tâ, rơdêi tâ tơdroăng tê mơdró xua mê khu tê mơdró thế ti tăng troăng prôk ăm dêi tơná. Khu tê mơdró hiăng veăng mơđah tơbleăng tơmeăm tung troăng điê̆n tưh môi tiah Tiki, Shoppe. Bu ai mâu troăng kố nếo tơniăn. Tíu tê mơdró điê̆n tưh cho châ tơƀrê ‘nâng’’.

Tơbleăng tơmeăm OCOP dêi tơring Đăk Hà a hneăng hôp tơpui tơno vâi kơdrâi pơxiâm tăng cheăng pêi kong pơlê Kon Tum

Pôa Nguyễn Quang Hòa, Kăn phŏ pơkuâ Kơ koan xiâm mơnhông mơdêk pêi chiâk deăng kong pơlê Kon Tum tối ăm ‘nâi, tung pơla pá puât dêi pơreăng COVID-19, rơtế mâu khu tê mơdró, khu tơrŭm cheăng, rơpŏng tê mơdró vâ tê tơmeăm OCOP, tíu cheăng hiăng pêi pro tơtro hnoăng tơdjêp kơchơ tê mơdró, tŏng kum tê tơmeăm.

Kơnôm mê ôh tá xê to kơdroh troh kơlo iâ má môi tơdjâk dêi pơreăng mê ối thăm pêi pro rĕng tơdroăng tê mơdró điê̆n tưh:

“Drêng ai pơreăng COVID-19 xông tâ tú, Khu pơkuâ ‘na pêi chiâk deăng xuân hiăng veăng tơbleăng ăm Vi ƀan kong pơlê mơjiâng tôh pêi cheăng hnê mơhno pêt mơjiâng ƀă tơdjêp tê tơmeăm pêi chiâk deăng tung kong pơlê. Á xuân tơbleăng tâi tâi tâng tơmeăm OCOP dêi tơná a Khu xiâm pơkuâ ‘na pêi chiâk deăng ƀă thăm pêi pro mâu troăng tê mơdró điê̆n tưh tung tíu tê mơdró điê̆n tưh.

Ing mê vâi chêh tơbleăng tơmeăm mê á xuân vêh tơbleăng ăm mâu tíu cheăng dêi tơná vâ tê tơmeăm a ngiâ ƀă ton xŏn. Ƀă kơchơ kân siêu thĭ mê tơbleăng tâi tâng tơmeăm OCOP dêi tơná hiăng châ tơƀrê’’.

Mâu khu tê mơdró, khu tơrŭm cheăng, rơpŏng tê mơdró dêi kong pơlê Kon Tum hơnăm hiăng hluâ thăm pơ’lêh troăng pêi tê mơdró tung điê̆n tưh hiăng pro troăng mơnhông châ tơƀrê tê tơmeăm tung pơla ai pơreăng COVID-19 xông tâ tú. Mơngế pêi chiâk deăng châ tê dêi tơmeăm pêi lo ing chiâk deăng, pêi lo tơ’nôm liăn vâ kâ Têt kố xuân tơniăn ăm gá hơtô.

Khoa Điềm chêh

A Sa Ly tơplôu ƀă tơbleăng