VOV4.Xơ Đăng - Khu xiâm pơkuâ mô đô̆i gak tơkăng kong Kon Tum tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ kong pơlê hiăng rơtế tơkŭm po tơdroăng ‘’Hâi phiu ro tâi tâng kuăn pơlê veăng gak kring hơnăm 2022’’ a 13 cheăm tơkăng kong péa tơnêi têa Lếo ƀă Kul. Rơtế ƀă vêh mơnhên tơdroăng pêi pro Pơkâ dêi Chin phuh ‘na tơdroăng tơkŭm po tơdroăng tâi tâng kuăn pơlê veăng gak kring hnoăng pơkuâ tơnêi tơníu, gak kring tơkăng kong tơnêi têa.

Diâp kơxuô tơmeăm ăm rơpŏng kơtiê tung ‘’Hâi phiu ro tâi tâng kuăn pơlê veăng gak kring’’

Hâi phiu ro tâi tâng kuăn pơlê veăng gak kring kheăn kơdeăn hên troăng pêi mơnhông mơdêk cheăng kâ – rêh ối pơlê pơla, pơ’lêh troăng tơmiât troăng pêi xuân hiăng châ pêi pro kum kuăn pơlê kơpong tơkăng kong. Roh kố, Khu xiâm pơkuâ Mô đô̆i gak tơkăng kong dêi kong pơlê Kon Tum ƀă khu râ kăn pơkuâ hnê ngăn cheăng Đảng, khu râ kăn pơkuâ kong pơlê hiăng diâp 2 toăng hngêi Rŭm môi tuăn, môi troăng pêi tăng cheăng pêi cho ro hdrê pro kăn; 120 kơxuô tơmeăm diâp ăm rơpŏng kơtiê; diâp kơxuô tơmeăm, liăn ngân tŏng kum ăm 90 ngế hok tro kơtiê, tơdrêng amê kheăn kơdeăn chât khu pú hên, ngế krê kơhnâ rơkê tung tơdroăng gak kring tơkăng kong tơnêi têa.

A Sa Ly tơplôu ƀă tơbleăng