Hâi lơ 16/3/1975, tâi tâng mâu lêng dêi kong pơlê Kon Tum tơdrêng ƀă Sư đoân 068 mot tơbriât pơkuâ mâu kơpong lêng, kal kí ki xiâm, pro tơleăng lĕm tâi tâng pơlê kong krâm Kon Tum ƀă kơpong peăng Kơnhŏng Tây Nguyên.

A rôh leh tơbâ, pôa Lê Ngọc Tuấn, Phŏ Kăn hnê ngăn Đảng kong pơlê, kăn hnê ngăn Vi ƀan kong pơlê Kon Tum tối: pro tơleăng lĕm Kon Tum cho tơdroăng ki kal dei Đảng ƀô̆, mâu lêng ƀă mâu kuăn pơlê hdroâng kuăn ngo tung kong pơlê, veăng ‘no hnoăng ki kal a tơdroăng lăm plâ pro rơdêi pro tơleăng lĕm rơnó Hơngui hơnăm 1975 pro tơleăng lĕm lâp peăng Hdroh tơnêi têa, lâp tơnêi têa tơrŭm môi.

Pơtối rak ki môi tuăn khên tơnôu, kơ’nâi 50 hơnăm pro tơleăng lĕm, Đảng ƀô̆, mâu lêng ƀă kuăn pơlê mâu hdroâng kuăn ngo kong pơlê Kon Tum hiăng tơkâ luâ tŭm tơdroăng xơpá, pơloăng mơnúa mơnhông pơlê pơla rế kro mơdrŏng. Hên hơnăm hlối kong pơlê Kon Tum pơtối rak ki tâk cheăng kâ a kơlo hên. Troh nôkố kơxô̆ rơpŏng kơtiê chu ối 4,31%; tơdroăng rêh ối tơmeăm khoăng dêi kuăn pơlê châ mơnhông, ngiâ méa thôn pơlê ƀă kơphô̆ ôh tá la lâi pơtê pơ’lêh nếo.