VOV4.XơĐăng - Tơdroăng ki pơtê pơtân mâu tíu ki chêh tối inâi châ chăn hbrâ mơdât pơreăng COVID-19 a mau troăng prôk ƀă troăng ki lăm ngi kong pơlê dêi kong pơlê Kon Tum châ pêi pro sap ing 12 chôu măng dế hâi lơ 12/1/2022. Tiah mê, ai 6 tíu ki chêh tối inâi vâ hbrâ mơdât pơreăng dêi kong pơlê Kon Tum a mâu troăng prôk pơtê pêi pro tơdroăng kố. Tung hlá mơ-éa pơtroh ăm mâu khu râ, kơvâ cheăng tíu pêi cheăng ối tung kong pơlê Vi ƀan hnê ngăn mâu tơring, pơlê kong kơdrâm pơkâ thế pơtê pơtân tơdroăng ki pêi pro mâu tíu ki chêh tối inâi vâ hbrâ mơdât pơreăng COVID-19 a hâi lơ 11/1, Vi ƀan hnê ngăn kong pơlê Kon Tum pơcháu ăm Vi ƀan hnê ngăn mâu tơring, pơlê kong kơdrâm pơkâ thế xo tơvêh mâu kế tơmeăm, ki kâng tât, kế tơmeăm xúa tung khăm pơlât, mơgrúa lĕm tơnêi tíu, xôh pơkeăng hdrối vâ lo ing tíu ki chêh tối inâi.

Hơlâ ki mot tung tíu ki chêh inâi vâ hbrâ mơdât pơreăng kơxô̆ 1 – Sao Mai

Kon Tum cho kong pơlê má mơ’nui a kơpong Tây Nguyên ăm pơtê pơtân mâu tíu ki chêh tối inâi hbrâ mơdât pơreăng COVID-19 a mâu troăng kân ƀă troăng ki prôk ngi kong pơlê.

Katarina Nga tơplôu ƀă tơbleăng