Klêi kơ'nâi hbrâ mâu kơxuô tơmeăm ki kŭn ƀă mâu kơtong tâ kơxop hlá mơ-éa kŭn lĕm, hên mơngiơk, Thiê̆u tă Lại Văn Đạt kơto rơxế djâ ngin chu a pơlê. 'Nâi nhŏng o prôk rơtế cho mơngế Jarai, mê ngoh  tơpui ƀă nâl kuăn ngo amê:

“Hâi kố, pin vêh lăm pôu a pơlê Ksing. Kố cho pơlê ki hiăng hmâ ƀă rơxông ối kŭn á nah. Vâi krâ nhŏng o Jarai akố rêh ối achê ƀă pâ dêi rơpó; mơhé tơdroăng rêh ối dêi hên rơpŏng xuân ối trâm hên xahpá”.

Kot mâ ƀă xông kân a kơpong tơnêi kố, Thiê̆u tă Lại Văn Đạt hiăng ai rôh châ trâm ƀă kuăn pơlê Jarai sap ing tơxĭn nah. Tung pơla pêi cheăng, hmâ trâm mâ, hnê tối, mơhnhôk, ngoh pơtối hriâm tơ'nôm, tơpui nâl Jarai hên tâ.

Rêm hdroh prôk  vêh a pơlê, Thiê̆u tă Đạt ƀă mâu vâi pú ối djâ tơvế mâu kơxuô tơmeăm ki kŭn. Mâu kơxuô tơmeăm mê cho mâu kơtong kơxop mơ-éa ăm hok tro ki ai tơdroăng rêh ối xơpá. Ing tơdroăng mơhnhôk dêi nhŏng o, pú hmâ ƀă Khu lo tŏng veăng cheăm, 500 to kơtong hiăng châ diâp ăm mâu vâi o hdrối vâ mot hơnăm hriâm nếo. Tung mê, ai muăn Ksor H'Yang a ƀuôn Ksing kuăn tê, muăn rêh ối ƀă pôa peăng pâ  Siu Got:

“Á hâk vâ ‘nâng kăn ƀô̆ Đạt. Ngoh cho môi ngế ki achê, đi đo hbrâ gum mâu muăn ai tơdroăng rêh ối pá puât ngăn môi tiah kuăn ‘nĕng tung rơpŏng. Ahdrối pơxiâm po hơnăm hriâm nếo, rơpŏng mâu muăn a kố ối hên pá puât, laga kơnôm tơdroăng tŏng gum teăm tơdrêng dêi ngoh Đạt ƀă mâu kơtong ƀă tơmeăm xúa hriâm tâp, mâu muăn hiăng ai tơ’nôm tơdroăng ki hâk vâ’’.

Hâk tơngăm dêi kuăn pơlê a tíu kố ƀă Thiê̆u tă Lại Văn Đạt ôh tá xê to kơxuô tơmeăm, mê cho tơdroăng tơmâng, achê. Hơnăm 2021, tung môi rôh pêi hnoăng cheăng pơla dế ai pơreăng COVID-19 tâ tú rơ-iô, Thiê̆u tă Đạt rơtế ƀă khu pêi hnoăng cheăng châ hlo môi ngế kơdrâi dế mơhum kuăn ngá. Ôh tá tơmiât klâi, ngoh rơtế ƀă khu pêi hnoăng cheăng djâ ngế kơdrâi troh a Hngêi pơkeăng cheăm Phú Thiện. Nôu kuăn hiăng mơhum tơniăn lĕm, Thiê̆u tă Đạt hnối dó inâi ăm muăn kơdrâi cho Hạ Vy, ƀă tơdroăng pói vâ "kơdroh ôh tá ăm ai xếo COVID". Nôu Em, jâ peăng nôu dêi muăn ăm 'nâi, hơnăm kố Hạ Vy lăm hriâm mau yăo, ối châ tơdah xo tơmeăm dêi kăn ƀô̆ Đạt.

“Rêm ngế pơrá 'nâi ngoh Đạt hdrối nah ối a pơlê kố ƀă cho kuăn dêi nôu Biên. Rêm rôh vêh lăm pôu pơlê, ngoh hmâ djâ dêi kơtong tâ kơxop hlá mơ-éa vâ diâp ăm mâu vâi o. Tung kơxô̆ mâu vâi o ki châ tŏng kum ai muăn Hạ Vy. Kố cho môi tơdroăng pêi pro ki pơxúa khât ƀă tro tơdroăng. Troh nôkố, ngoh xuân ối pơtối pêi pro hên tơdroăng tŏng kum, diâp tơmeăm mơhriâm ăm mâu vâi muăn."

Ing mâu rôh vêh a pơlê, Thiê̆u tă Lại Văn Đạt mơjiâng ƀâng Facebook "Kŏng an vêh a pơlê", chêh xo mâu um méa kăn ƀô̆, mâu lêng vêh a pơlê, tơpui tơno ƀă kuăn pơlê, tí tăng 'nâi plĕng tơdroăng rêh ối ƀă tŏng kum kuăn pơlê. Klêi kơ'nâi dâng pái măng tĭng, vâ chê 60 clip châ tơbleăng, mơhnhôk vâ chê 9.000 ngế tiô ngăn. Mâu clip châ vâ chê 500 rơpâu roh ngăn. Thiê̆u tă Lại Văn Đạt tối tiah kố, um méa ngế kŏng an dế ối achê ƀă kuăn pơlê, ối rơtế ƀă kuăn pơlê, tơpui nâl dêi kuăn pơlê, tơmâng kuăn pơlê ƀă tơpui ƀă kuăn pơlê.

“Mâu lêng kong an ngin mê ai (6 tơdroăng Pôa Hồ hnê Kŏng an kuăn pơlê. Tung mê, pơkâ thế á đi đo nhoăm ƀă nhoăm pâ kuăn pơlê) thế môi tuăn ƀă Đảng, Tơnêi têa; ƀă kuăn pơlê, ngin thế nhoăm pâ, ai luât phêp. Kố xuân cho môi tơdroăng pêi pro tiô rơkong hnê dêi Pôa Hồ xuân môi tiah tơdroăng mơhnhôk tơ'noăng "Pái má môi" dêi Khu xiâm pơkuâ Kŏng an, tung mê ai "achê kuăn pơlê má môi".

Rơtế prôk ƀă túa pơkâ “Kŏng an vêh a pơlê" cho o kơdrâi Jari Rah Lan Wĩ, ối a Plei Kte Lớn A, cheăm Phú Thiện, kong pơlê Gia Lai. Cho môi tung mâu ngế ki mơjiâng tơdroăng "rơtuh view" ing pơlê cheăm, Rah Lan Wĩ hiăng kum Lại Văn Đạt chêh xo mâu tơdroăng ki ai khât, hơniâp ro:

"Ngoh Đạt cho ngế kăn ƀô̆ Kŏng an kuăn pơlê ki achê kuăn pơlê vâ hnê tối, mơhnhôk kuăn pơlê pêi pro troăng hơlâ, luât dêi Đảng ƀă Tơnêi têa. Tung tơdroăng pêi cheăng mê, ngoh Đạt pơrá kơ-êng á mâu rơkong tơpui ƀă Jarai vâ tơpui ƀă kuăn pơlê lĕm tro tâ. Rêm roh vêh a pơlê, kuăn pơlê hâk mơnâ ngoh Đạt; lăm troh ulâi, kuăn pơlê xuân kêi hlá pôm loăng pro tơmeăm diâp ăm. Kơnôm ing tơdroăng mơ-eăm kơhnâ hriâm nâl Jarai mê ngoh Đạt hlê plĕng tơdroăng púi vâ dêi kuăn pơlê".

Ing mâu tơdroăng pêi pro ki kŭn, achê ƀă kuăn pơlê, Thiê̆u tă Lại Văn Đạt ƀă mâu ngế cheăng Kŏng an cheăm Phú Thiện, kong pơlê Gia Lai dế pêi pro nhên rơkong Pôa Hồ hnê Kŏng an kuăn pơlê: nhuô̆m, pâ mơnê ƀă kuăn pơlê, hmâ achê ƀă kuăn pơlê. Hriâm nâl kuăn pơlê, vêh ƀă pơlê, tơmâng ƀă veăng kum kuăn pơlê, vâ um méa ngế lêng Kŏng an rế achê kuăn pơlê, hlê kuăn pơlê ƀă xua kuăn pơlê pêi cheăng.