*** Ki nhên, a cheăm Ia Hiao, kong mêi ton hâi hiăng pro 120 rơpŏng tro têa lân lu troh a hngêi ối; 109 ha báu rơnó xeăng têa, 86 ha alâi, prá, to ƀă 43 ha pôm loăng ki hiăng tơlâk, tơđôu vâ riân tơmeăm ki tro tơ’nhiê ai lối 2 rơtal 400 rơtuh liăn.

Tơdrêng ƀă tơdroăng ki pêi pro mâu troăng hơlâ ki kal tơdrêng athế kring vế tơniăn ăm kuăn pơlê, mê khu râ pơkuâ ngăn dế séa mơnhên ngăn, pâ thế rĕng kĭ tơkêa tơdroăng ki vêh pro pơlê nếo ăm mâu rơpŏng ki hmâ tro têa lân lu rêm hơnăm, tơdrêng amê, pâ thế tŏng gum kơxô̆ liăn ki vâ mơnhông pêi chiâk pêi deăng, rak tơniăn tơdroăng rêh kâ ối dêi kuăn pơlê.

*** A cheăm Ea Bung, kong pơlê Dak Lak mâu rơpŏng kuăn pơlê a thôn 4 ƀă thôn 12 tro têa lu, troăng prôk troh a cheăm Ea Bung, Ia Rvê tro têa lu. A cheăm Ia Lôp, thôn 10 vâ luâ thôn 11 tro têa lu trâu hên troăng prôk kĕn mâu thôn 6, 8, 9, tro têa lu trâu oh tá chiâng prôk, pro chôm tung hên chôu.

A cheăm Tây Sơn, kong mêi kân pro tơhnâp hên troăng prôk DT 646 ƀă mâu troăng prôk troh mâu thôn, troăng prôk troh a klâng. Tơdrêng amê, ai 29 to ro tro têa mơhiu; kơnâng kân Hngêi trung Mầm non công lập Phước Tân tro têa lu trâu 40m. Nôkố, mâu kăn thôn,  cheăm,  kong pơlê hiăng mơhnhôk mâu ngế veăng pêi pro vâ tơkâ luâ xơpá, kum kuăn pơlê tơniăn ‘na troăng prôk.

*** Kong mêi têa kân lân lu lối 300 toăng hngêi kuăn pơlê a 4 to thôn dêi cheăm Hiệp Thạnh, kong pơlê Lâm Đồng. Vâ gum ăm kuăn pơlê thâ rĕng tơniăn tơdroăng rêh kâ ối, mê khu kăn hnê ngăn cheăm hiăng pơtối mơhnhôk mâu kăn ƀô̆, mâu lêng, mâu kŏng an, khu lêng tŏng gum kuăn pơlê chơ, pơto, chiân dêi kế tơmeăm ing hngêi ki tro têa lân troh a tíu ki tơniăn.

A cheăm achê têa kơxĭ Hoà Thắng, kong mêi râ kân hiăng pro tơnêi, prêi lân mot tung hngêi dêi kuăn pơlê. Đông gak tơkăng kong Hoà Thắng hiăng mơhnhôk mâu kăn ƀô̆, mâu lêng veăng gum kuăn pơlê kơpuih văng, pro mơgrúa hngêi trăng, troăng klông vâ tơniăn ăm tơdroăng rêh kâ ối.