VOV4. Xơ Đăng - Kơxo lơ 2/3, a pơlê kong kơdrâm Kon Tum, Vi ƀan kong pơlê Kon Tum  ƀă Vi ƀam mâu kăn kong pơlê Attapư ( Lếo) hiăng ai rôh pêi cheăng , môi tuăn tơdroăng cheăng tơrŭm tơkŭm po hriâm tâp tŏng kum mâu ki trâm xía vâ drêng têa rơlêa kân, têa rơlêa hlối pro tơhnâp tơnêi tơdjâk troh tơdroăng rêh ối kuăn pơlê a kơpong chê tíu tơkăng kong ƀă péa to kong pơlê.

Tâ tá rôh hôp tơpui tơno

Tối tơbleăng a rôh pêi cheăng, pôa Nguyễn Hữu Tháp, Kăn xiâm phŏ hnê ngăn Vi ƀan kong pơlê Kon Tum ƀă pôa Bun-Sợt Sệt-thi-lạt, Kăn xiâm phŏ hnê ngăn kong pơlê Attapư tối ‘na tơdroăng mơnhông cheăng kâ-rêh ối dêi péa kong pơlê ƀă ki ăm hlo tơdroăng trâm xía vâ xúa kong prâi pro, on chếo pro tung hơnăm hdrối kô nah.

A rôh pêi cheăng, péa pâ môi tuăn ƀă kĭ tơrŭm cheăng tung hlá mơ-éa chôu vế tơrŭm tơbleăng pêi tơ-brê tơdroăng pơkâ thế tŏng kum mâu ngế trâm xía vâ, pêi pro tơdroăng tơkâ luâ xơpáxua kong prâi pro pơla péa to kong pơlê.

Tung hơnăm 2022, péa kong pơlê Kon Tum ƀă Attapư kô tơrŭm tơkŭm po hriâm tŏng kum mâu ngế xiá vâ drêng kong mêi têa rơlêa kân, tŏng kum drêng trâm xía vâ xua kong mêi têa rơlêa tơnêi hlối tơnâp a troăng tơkăng kong pơla péa to kong pơlê. Tíu tơkŭm po a cheăm Pờ Y, tơring Ngọc Hồi, kong pơlê Kon Tum.

Gương tơplôu ƀă tơbleăng