A roh pêi cheăng, teăng mâ Kŏng ti mơjiâng pro tơmeăm lâp plâi tơnêi Kơ koan xiâm 2 troăng rơxế lơtreng Sinuâ pói vâ kong pơlê Lâm Đồng tối ‘na pơkâ tơdjâk troh troăng rơxế lơtreng Đà Lạt – Tháp Chàm, pro tơ’lêi hlâu vâ châ achê, pêi pro mâu troăng ki kal troh kêi đeăng tơbleăng hriăn plĕng chiâng pêi pro vâ châ pêi pro tơdroăng tơkêa bro rơnêu pro troăng rơxế lơtreng kố.

Tơdrêng amê, Kŏng ti mơjiâng pro kế tơmeăm khoăng lâp plâi tơnêi Kơ koan xiâm 2 troăng rơxế lơtreng Sinuâ xuân pơkâ thế kong pơlê Lâm Đồng ăm phêp ti tăng plĕng, tơpui tơno roh tơ’lêi hlâu tơrŭm cheăng vâ mơhnho po rơdâ pêi pro troăng kân kơneăng lâp plâi tơnêi tơdjêp Đà Lạt – Singapore, Đà Lạt – Siem Reap ƀă mâu kong têa Peăng mâ hâi lo pá kơnhŏng châu Á môi tiah Nhuk, Hàn Quốc.

Tiô pôa Trần Hồng Thái – Kăn hnê ngăn Vi ƀan kong pơlê Lâm Đồng, tơdroăng rơnêu pro troăng rơxế lơtreng Đà Lạt – Tháp Chàm xuân môi tiah po rơdâ troăng tơƀai kơneăng pơrá cho kal khât, tơtro ƀă mâu pơkâ hiăng châ kĭ.