Cho kơpong đi đo tro tơdjâk dêi kong prâi pro, khía mơhot têa lân lu, peăng mâ hâi Lo kong pơlê Gia Lai (kong pơlê Bình Định ton) nếo trâm mơhot roh má 13 ƀă roh kong mêi têa lân lu ki kân má mơ’nui hơnăm 2025, pro tro lŭp râ ó ăm tơdroăng rêh ối ƀă pêt mơjiâng tơmeăm dêi kuăn pơlê. Hrĭng toăng hngêi tro tơhnâp, rơpâu toăng hngêi tro lân lu, rơpâu met kơ’noăng kâng têa kroăng, têa plông tro tơhnâp pro tơnêi tơbêng, lân lu ƀăng chiâk deăng pêt tơmeăm. Hdrối Hneăng hôp má XIV dêi Đảng, jâ Huỳnh Khánh Ly, thôn Luật Lễ, cheăm Tuy Phước Đông, kong pơlê Gia Lai pâ thế:

‘’Hneăng hôp Đảng roh kố kuăn pơlê pêi chiâk deăng a kơpong pói vâ châ Tơnêi têa pơtối tơmâng troh kơpong tơ’nêi a’nâi, kơpong têa lân lu. Rơtâ tá cho pŭn pâ peăng têa kroăng rơtâ tá tâi tâng. Kuăn pơlê xuân vâ cho kơ’noăng kâng têa châ pro lĕm tro tâ, troăng prôk chêng, kông tíu mơhno têa hbrông, troăng klông thăm tơ’’lêi hlâu tâ vâ kuăn pơlê pêi kâ mơnhông mơdêk tâ’’.

Rơtế tơdjuôm tơdroăng púi vâ mê, pôa Nguyễn Thanh Dũng, Ngế pơkuâ Khu pêi cheăng tơrŭm ngăn pêi chiâk deăng Phước Thuận, Gia Lai tối tiah kố, tơdroăng ki pá ta tơmeăm khoăng cho tơdroăng ki xiâm ƀă kơpong xiâm tro têa lân lu.

 “Kơpong  xiâm têa lân lu ó mê cho tơdroăng ăm hiu vâ rĕng xiâ xuân cho tơdroăng pêi pro trâm hên  xơpá. ‘Na tơmeăm khoăng xuân púi ngah Tơnêi têa tơmâng rĕng mơjiâng pro: Má môi cho ‘no liăn pro troăng prôk, má péa cho tơdroăng kâng rơchôa, mơ’no tah têa lu”.

Vâ troh hneăng hôp kân 14 dêi Đảng, jâ Tô Thị Thu Hường, Phŏ kăn hnê ngăn Đảng ủy bêng Quy Nhơn, tối loi khât tiah kố tung tơdroăng pơ’lêh kơxô̆ pêi cheăng lĕm tro ki Đảng dế pơkuâ hnê mơhno, kô ai tiô tơdroăng tơngah kân dêi kuăn pơlê, ‘na môi tơdroăng mơnhông krá ton xua kong prâi pro ôh tá tơniăn - hyôh kong prâi hơ’lêh. Tơdrêng amê,  mâu tơdroăng châ rah pêi tơdrêng ing hneăng hôp Kân, kô mơnhông tơnêi têa xông tơƀrê rĕng tung mâu hơnăm la ngiâ. ‘Na peăng Đảng ƀộ bêng, đi đo mơ-eăm tơ’noăng pêi cheăng vâ koh tơbâ hneăng hôp kân:

“Kơ’nâi mâu tơdroăng tơdjâk dêi khía mơhot kân têa lân lu, Quy Nhơn hiăng chôa ‘mâi mơnhông mâu tơdroăng cheăng vâ troh hneăng hôp Kân Đảng rôh má 14. Tung mâu hâi phiu ro hlá cơ chúa hên môi tiah reăng rơtế hên mơngiơk ing kong kế hiăng pro lĕm mơnâ mâ, hiăng hbrâ nhên tŭm tơdroăng vâ pêi tro mâu tơdroăng cheăng châ pơcháu. Kuăn pơlê bêng Quy Nhơn dế pêi pro mâu tơdroăng cheăng vâ troh hneăng hôp Kân ƀă tuăn loi hlối tơngah khât a mâu troăng pêi pro ki nếo dêi Đảng”.

Kô hlo, ing tơdroăng ai khât pá puât kơpong xiâm têa lân lu peăng Mâ hâi Lo Gia Lai, mâu tơdroăng pâ thế, púi ngah dêi kuăn pơlê ƀă mâu tíu pêi cheăng xuân tơkŭm a tơdroăng kal vâ ai tơdrêng ‘na tơmeăm khoăng krá ton. Vâ troh hneăng hôp kân mâu kăn tung  lâp tơnêi têa  rôh má 14 dêi Đảng, tuăn loi ƀă tơngah dêi Kuăn pơlê châ pơtroh a mâu pơkâ vâ pêi, ton hơnăm, xo kuăn mơngế pro xiâm, xo ki tơniăn, cheăng kâ ƀă mơnhông krá tơniăn pro xiâm ki ton hơnăm.