Ô vâi krâ - nhŏng o, pú hmâ, mâu lêng tung lâp tơnêi têa!

Tung chôu phut ki krih tơviah koh tơdah hơnăm nếo Nhâm Dần, á ƀriê mơnê păng ‘nâng, teăng mâ khu kăn xiâm pơkuâ hnê ngăn Đảng, Tơnêi têa ƀă Vi ƀan xiâm Măt trâ̆n Tơnêi têa Việt Nam, á pâ pơtroh kuăn pơlê, pú hmâ, khu lêng tung lâp tơnêi têa rơtế ƀă kuăn pơlê pin ki rêh ối, pêi cheăng a kong têa ê mâu tơdroăng ki koh mơnê, phiu ro, rơkong rơkâu mot hơnăm nếo lĕm tro má môi. Á xuân pâ pơtroh tâi tâng mâu pú hmâ ki ối tung 5 kơpong, kuăn pơlê tung lâp tơnêi têa rơkong rơkâu hơniâp ro, tơrŭm, kro mơdrŏng ƀă trâm tơdroăng hơniâp hơnâ, phâi tơniăn, ro rih.

Koh tơbâ rơnó Hơngui Nhâm Ngọ hơnăm 1942, a hlá tơbeăng “Việt Nam tơniăn krê”, Pôa Hồ Chí Minh, Kăn xiâm hnê ngăn tơnêi têa hneăng hdrối hiăng ai chêh:

Rơkâu tâi tâng tơnêi têap in tung hơnăm kố

Hlá cơ khêi hlŏng trĭng kơneăng a ‘ngêi

Hơnăm kố cho hơnăm ki ai hên hơniâp ro

Rơkong rơkâu dêi Pôa hơnăm kố klăng 80 hơnăm. Maluâ tơdroăng roh nah nôkố hiăng ai hơ’lêh ki nếo; cho hnoăng cheăng ki hiăng châ mơjiâng pro ing mâu tơdroăng ing chal vâi krâ roh ton nah dêi hdroâng kuăn mơngế, hiâm mơno tơrŭm cheăng, tuăn mơno ki hơ-ui pâ, tơdroăng ki krá kâk, kro mơdrŏng tơdroăng ki khên tơnôu, khên pleăng dêi hnoăng ing tơrêm kuăn pơlê pin, sap nah troh nôkố xuân ôh tá la lâi kâi hơ’lêh.

Hơnăm 2021, tung pơla chôu phut ki trâm pá puât, pơloăng mơnúa, pin hiăng châ hlo mâu um meá ki lĕm tro, hnoăng cheăng ki rơkê khât ‘na tơdroăng ki veăng ‘no hnoăng cheăng, tơdroăng ki pleăng dêi hnoăng tơná tung pơlê pơla a tơrêm khu kuăn pơlê: Mê cho mâu ƀok thái pơkeăng, mơngế ki cheăng ngăn ‘na pơkeăng ƀă khăm pơlât, mâu lêng, mâu ngế ki pleăng hnoăng cheăng ôh tá xâu ki klâi mâu tơdroăng ki xâu xía a kơpong ki dế ai pơreăng, pơtê ‘nôi mâu hnoăng cheăng dêi rơpŏng hngêi, nôu pâ krâ, kuăn ối tơxĭn; mê cho mâu vâi krâ ki hiăng xo dêi tâi  liăn ngân ki tơná kơdĭng vâ veăng kum ăm kơxô̆ liăn ki hbrâ, tơplâ mơdât pơreăng COVID-19; mê cho mâu vâi ‘nĕng phô̆m vâ xông kân, mâu vâi o, vâi muăn tơxĭn hiăng kơchuâ mâu um ki lĕm tro, hên mâu ƀai thơ ki ro, hlá kơthô ki pro ƀriê phoih tung hiâm mơno, mơhno tối tơdroăng pói rơhêng vâ, tơdroăng mơjo pâ kơ mâu ngế cheăng ‘na pơkeăng ƀă khăm pơlât, ƀok thái pơkeăng, xuân môi tiah loi tơngah ‘na ivá dêi Việt Nam tung tơdroăng ki xahpá xua pơreăng pro ƀă hên hĕng mâu tơdroăng ki ê.

Tung chôu phut kố, ai mâu ngế kuăn dêi mơngế Việt Nam dế ối pêi hnoăng cheăng tơplâ, mơdât, mơdât pơreăng; mâu đông lêng hâi măng gak ngăn, rak vế tơdroăng tơniăn, kring vế troăng tíu tơkăng kong, chuăn, rơlố lơ mâu vâi nâ o dêi rêm khu râ, pơtối kơhnâ khât hnoăng cheăng dêi tơná, ki ôh tá châ tơdah Têt, châ xah hêi hâi Têt a dêi rơpŏng hngêi tơná.

Đảng, Tơnêi ƀă kuăn pơlê koh mơnê mâu tơdroăng kodo mơ-eăm xua hnoăng cheăng ƀă pơlê pơla, tơnêi têa. Tơnêi têa vêh mơnhên, chôu vế mâu tơdroăng ki pleăng hnoăng cheăng dêi kuăn pơlê, khu pú hmâ, koh mơnê hiâm mơno ki mơjo pâ tơnêi têa dêi kuăn pơlê pin ki rêh ối a kong têa ê ƀă tơdroăng tŏng kum ing khu pú hmâ lâp plâi tơnêi.

 Ing tơdroăng ki pơloăng, mơnúa thăm rế pro mơhriâm tơ’nôm ăm pin ivá ki ó rơdêi dêi hiâm mơno tơrŭm cheăng, môi hiâm mơno, tơdroăng ki tơnôu, krá kâk tung hiâm tuăn, tơxâng ƀă hiâm mơno khên tơnôu dêi pâ pôa pin tung plâ rêh ối, pêi cheăng, tiah tơdroăng ki hiăng hmâ pơto pơtih “kơxo mơdât khía mơhot, kơxê hơngế on tô”, tơkâ luâ rơpâu hơnăm ki pleăng hnoăng cheăng, mơjiâng ƀă mơnhông kring vế tơnêi têa.

Rơkâu kơ rêm rơpŏng hngêi Việt Nam mơjo pâ ai mâu hâi Têt ki hơniâp ro, phâi tơtô ƀă tơniăn. Pâ rơkâu rêm ngế kuăn pơlê Việt Nam, kuăn pơlê pin mot tung hơnăm nếo Nhâm Dần 2022 tơniăn ro, mo krá, ƀlê chiâng ƀă hơniâp ro.

Pâ phep koh mơnê ƀă rơkâu tŭm tơdroăng lĕm ro tung hơnăm nếo!

KĂN XIÂM HNÊ NGĂN TƠNÊI TÊA

                                                                                               NGUYỄN XUÂN PHÚC