VOV4.Xơ Đăng - Hâi lơ 12/1, a Hà Nội, Khu ki tí tăng ‘nâi plĕng Tơnêi têa tơkŭm po rôh hôp ‘no tơdrêng ing troăng hyôh Internet lâp tơnêi têa mơgêi hnoăng cheăng kơvâ tí tăng ‘nâi plĕng Đảng hơnăm 2021 ƀă tơbleăng hnoăng cheăng hơnăm 2022. Pôa Phan Đình Trạc, ngế cheăng tung tíu xiâm kal kí, kăn xiâm pơkuâ ngăn tíu xiâm Đảng, kăn pơkuâ khu tí tăng ‘nâi plĕng Tơnêi têa, kăn phŏ pơkuâ Khu hnê mơhno cheăng Tơnêi têa ‘na hbrâ mơdât kâ kơluâ liăn ngân, pơkuâ po rôh hôp.

Tơpui mơgêi rôh hôp, pôa Phan Đình Trạc tối nhên hnoăng cheăng tí tăng ‘nâi plĕng Đảng hơnăm 2021 pêi pro châ hên tơdroăng ki kal ƀă pêi pro tâi tâng mâu tơdroăng cheăng. ‘Na hnoăng cheăng ki xiâm hơnăm 2022, pôa Phan Đình Trạc pơkâ thế tâi tâng kơvâ cheăng tí tăng ‘nâi plĕng Đảng mơdêk ki tơƀrê dêi hnoăng cheăng hriăn ngăn, pơkâ mơ’no túa tơmiât, troăng hơlâ pơkâ dêi Đảng ‘na hnoăng cheăng tí tăng ‘nâi plĕng, hbrâ mơdât kâ kơluâ ƀă hơ’lêh luât, tung mê rĕng pêi klêi mâu tơdroăng pơkâ ki kân pơtroh ăm Khu pơkuâ ngăn Tơnêi têa, Khu xiâm pơkuâ tơdroăng kal kí, Khu pơkuâ ngăn Đảng tiô tơdroăng pơkâ mơ’no.

Katarina Nga tơplôu ƀă tơbleăng