Hneăng hôp kân XIV dêi Đảng dó inâi: Pá kơdâm hlá cơ ki ô eăng dêi Đảng, tơdjuôm ivá, môi i hiâm mơno pêi pro ƀlêi trâng mâu hnoăng cheăng xiâm tung mơnhông tơnêi têa troh a hơnăm 2030; ing tơná pơkuâ rak dêi hnoăng cheăng krá tơniăn ton; ing tơná khên tơnôu dêi xêh tơdroăng mơnhông, loi kơnôm dêi tơná, mơnhông ó rơdêi tung chal ki mơnhông dêi hdrông mơngế xua tơdroăng hơniâp lĕm, tơniăn krê, pêi pro tiô tuăn mơno kuăn pơlê, kro mơdrŏng, tơtêk ó rơdêi, hloh rơkê, hơniâp ro, chân krá chêng prôk to a chuh ngiah xah hô̆i.

Hneăng hôp kân XIV dêi Đảng hiăng pêi pro kêi mâu hnoăng cheăng ki pơcháu, mơ’no, ƀă hnoăng cheăng tơpui mơnhên, trâu rơdâ ‘na hnoăng pêi pro tiô Pơkâ Hneăng hôp kân XIII hnối pro adrêng tung mơgêi 40 hơnăm Pơhlêh nếo, vêh mơnhên mâu hnoăng cheăng ki kal tung rơkê plĕng, mơhno tối mâu tơdroăng ki tá hâi châ chiâng pêi pro, ối ‘ro ƀă ki xiâm rêi, ing mê, mơhno tối mâu ƀai mơhriâm ki kân, kơnía ‘na tơpui leăng ƀă ki ai păng ‘nâng ton xŏn ăm hneăng ki mơjiâng, mơnhông tơnêi têa; tơpui mơnhên ƀă tối tơbleăng troăng  hơlâ prôk, ki xiâm, hnoăng cheăng kal xiâm tung pơhlêh kân ki krá ó rơdêi ăm hneăng hơnăm 2026-2030, hnoăng cheăng vâ pêi pro troh a hơnăm 2045; séa mơnhên, tơpui hnê tối trâu rơdâ, hơngế ƀă tŭm têk rêm kơvâ cheăng tung hnoăng cheăng mơjiâng Đảng, khu cheăng pơkuâ ngăn ‘na kal kí krúa lĕm, krá tơniăn tung tâi tâng kơvâ cheăng; pôk Khu xiâm pơkuâ hnê ngăn Tíu xiâm Đảng hneăng XIV.

Ƀă tuăn hiâm pơhlêh nếo, ƀă hnoăng pôu râng hnoăng cheăng ki kân rơdâ dêi Tơnêi têa ƀă Hdrông mơngế. Hneăng hôp kân mê hiăng rah xo ƀă pôk Khu kăn xiâm pơkuâ hnê ngăn Tíu xiâm Đảng hneăng XIV ai 200 ngế, tung mê, ai 180 ngế cho Ngế ki hiăng mot păng ‘nâng ƀă 20 ngế cho mâu ngế ki hbrâ.

Kơxo lơ 23/1, Khu xiâm pơkuâ hnê ngăn Tíu xiâm Đảng hneăng XIV hiăng po Roh hôp má môi, pôk Khu xiâm pơkuâ ngăn cheăng Kal kí, Kăn xiâm pơkuâ hnê ngăn, Khu xiâm pơkuâ hnê ngăn, Vi ƀan Séa ngăn Tíu xiâm Đảng, Kăn ngăn Vi ƀan Séa ngăn Tíu xiâm Đảng hneăng XIV.

Hneăng hôp kân mâu kăn teăng mâ lâp tơnêi têa roh má XIV dêi Đảng hiăng ƀlêi chiâng lĕm tơniăn cho mơhno dêi khôi túa ki tơrŭm dêi Đảng, cho um méa dêi tuăn loi ƀă git púi xua môi Việt Nam hơniâp ro, tơniăn krê, pêi pro tiô tuăn mơno kuăn pơlê, kro rơdêi, mơdrŏng kân, rơkê plĕng, hơniâp ro; chân krá  hvêa chêng mot tung chal ki nếo, chal ki kro rơdêi kơnôm ai tơdroăng pơkuâ ngăn, râng hnoăng dêi Đảng, mơjiâng ƀlêi chiâng tơnêi têa Việt Nam xah hô̆i chuh ngiah.