Hneăng hôp dêi Đảng dó inâi: Pá kơdâm hlá cơ ƀlêi trâng dêi Đảng, tơdjuôm ivá, môi hiâm mơno pêi pro ƀlêi trâng mâu pơkâ mơnhông tơnêi têa troh hơnăm 2030; pơkuâ xêh troăng pêi cheăng ton xŏn, xông mơ-eăm xêh, loi tơngah, prôk rơdêi tung chal xông mơ-eăm xêh dêi hdroâng mơngế xua hơniâp lĕm, tơniăn krê, kuăn pơlê pơkuâ dêi hnoăng cheăng, krá tơniăn, kro mơdrŏng, mơnhông tơtêk, hơniâp ro, krá tơniăn to tiô troăng chuh ngiah xah hô̆i.

Hneăng hôp kân má XIV dêi Đảng hiăng kêi đeăng mâu tơdroăng pơkâ mơ’no, ƀă hnoăng cheăng hvái ngăn tơdroăng pêi pro Tơdroăng pơkâ Hneăng hôp kân má XIII ƀă mơgêi 40 hơnăm pơhlêh nếo, mơnhên mâu tơdroăng châ tơƀrê kal má môi, mơhno mâu tơdroăng ki ôh tá hâi tŭm, ối ‘ro ƀă xiâm kối, xo vêh mâu túa ki rơkê tơtro kân; tơpui tơno ƀă tơbleăng troăng pêi la ngiâ, pơkâ pêi, hnoăng cheăng ki xiâm mơnhông mơdêk ton xŏn ăm hneăng hơnăm 2026 – 2030; pơkâ hnoăng vâ pêi troh hơnăm 2045; hvái ngăn tơdroăng cheăng  trâu hơngế ƀă tâi tâng tơdroăng mơjiâng Đảng, khu cheăng kal kí krúa lĕm, krá tơniăn ó rơdêi tâi tâng; ƀă hnoăng cheăng ki kân a ngiâ Tơnêi têa ƀă Hdroâng mơngế, Hneăng hôp rah xo ƀă pôk Khu pơkuâ Xiâm Đảng hneăng má XIV ai 200 kăn, tung mê ai 180 kăn ối tung Ủi viên ki păng ‘nâng ƀă 20 kăn Ủi viên ki hbrâ.

Kơxo lơ 23/1, Khu xiâm pơkuâ hnê ngăn Đảng hneăng má XIV tơkŭm po Hneăng hôp roh má môi, rah xo Khu xiâm kal kí, Kăn xiâm pơkuâ hnê ngăn Đảng, Khu pơkuâ hnê ngăn cheăng Đảng, Vi ƀan Séa Khu xiâm Đảng, Kăn pơkuâ Vi ƀan Séa ngăn Xiâm Đảng hneăng má XIV.

Hneăng hôp kân mâu kăn teăng mâ lâp tơnêi têa roh má XIV dêi Đảng châ tơƀrê lĕm, cho um mơhno dêi khôi túa lĕm tro vâi krâ nah tơrŭm môi tuăn dêi Đảng, cho um mơhno dêi tơdroăng loi tơngah ƀă tơdroăng pói vâ xua môi Việt Nam hơniâp lĕm, tơniăn krê, kuăn pơlê pơkuâ dêi hnoăng cheăng, kro mơdrŏng rơdêi ing pơkuâ, pôu râng hnoăng kân dêi Đảng, mơjiâng châ tơƀrê tơnêi têa Việt Nam xah hô̆i chuh ngiah.