Tiô mâu kăn, hneăng hôp 13, Khu kăn Tíu xiâm Đảng, Khu xiâm Kal kí, Khu kăn chêh tôm xo rơkong đi đo môi tuăn, krá rơdêi, tơrŭm dêi rơpó, vâ môi tuăn, rak luât pơkâ, tơmâng ngăn khât tơdroăng pơkâ, troăng hơlâ, hnoăng cheăng pơkuâ hnê ngăn tơnêi têa pêi mâu tơdroăng tơkâ luâ xơpá, pơloăng mơnúa, vâ tối pê klêi mâu pơkâ, tơdroăng cheăng Pơkâ a hneăng Hôp 13 dêi Đảng hiăng pơkâ, tung mê, ai hên tơdroăng pê klêi tơniăn. Tơpui a tôh, pôa Phạm Minh Chính - Ngế pro xiâm hnê ngăn tơnêi têa tối nhên ƀai hriâm thế tơrŭm dêi rơpó:

"Tơdroăng má môi cho tơrŭm dêi rơpó. Tâng ôh tá tơrŭm ti lâi vâ chiâng ai môi tiah hâi kố. Pin thế rak tuăn tơmiât ki tro, khŏm tơrŭm dêi rơpó tung khu, tơrŭm ƀă lâp plâi tơnêi mê pin nếo châ vâi nhoăm, nếo ai rơkong tơpui. Mê cho tơdroăng ki xiâm. Tối nhên akố ôh ti xê to tâi tâng Đảng mê tá a kơ koan tíu pêi cheăng đông lêng, cheăm bêng, kong pơlê kô hlê tơdroăng tơrŭm môi tuăn dêi rơpó. Tơrŭm dêi rơpó thế hlê dêi rơpó, tối ăm dêi rơpó ‘nâi mâu tơdroăng, thăm nếo thế hlâ rêh xua dêi rơpó”.

Mâu tơdroăng veăng tối mê ai tối nhên pơtối hlê trâu mâu tơdroăng vâ pêi tung rơxông nếo hlối pơkâ pêi péa tơdroăng pơkâ 100 hơnăm ki tơdroăng Pơkâ hneăng Hôp 13 dêi Đảng hiăng tối:  Pơkâ pêi la ngiâ hơnăm 2030 cho tơbâ 100 hơnăm mơjiâng Đảng ƀă chiâng môi tơnêi têa dế mơnhông cheăng ƀă kơmăi kơmok tiô túa nếo, pêi lo liăn da dâk hên. Hơnăm 2045, tơbâ 100 hơnăm mơjiâng tơnêi têa, chiâng tơnêi têa xah hô̆i chuh ngiah mơnhông pêi lo liăn hên. Vâ ai tiah tơdroăng pơkâ mê, pôa Đỗ Tiến Sỹ, tung khu kăn Đảng ƀô̆ Chin phuh pâ thế:

"Mơni kal thế pêi trâu tâ ki tơƀrê mơnhông cheăng tro tiô khoa hok, hơ’lêh nếo ƀă pơ’lêh kơxô̆ dêi tơnêi têa ƀă vâ ai tiah mê khât xuân môi tiah rơkong Kăn xiâm pơkuâ hnê ngăn Đảng tối cho tơƀrê tơdroăng pêi pro tiô Pơkâ hneăng Hôp 14 tối pêi thế luâ tâ tâng vâ pơchông ƀă Hneăng hôp hdrối mê, mơhno nhên ki xiâm, troăng pêi ki khât  troh  tơbleăng pêi  tơdroăng Pơkâ hneăng Hôp 14. ngin hlo tiah kố tơdroăng ki vâ pêi luâ tâ mơnhông cheăng khoa hok kŏng ngê̆, hơ’lêh nếo hriăn plĕng ki nếo ƀă pơ’lêh kơxô̆ dêi tơnêi têa tơdjâk troh mâu ngế pêi cheăng pêi lo, tơrŭm cheăng pê lo ƀă troăng hơlâ pêi pro vâ pro xiâm ki nếo, ivá rơdêi nếo tung cheăng kâ. Tung mâu hơnăm la ngiâ thế tơƀrê mơnhông khoa hok kŏng ngê̆, hơ’lêh nếo, hriăn plĕng ki nếo, pơ’lêh kơxô̆ dêi tơnêi têa”.

Tiô pôa Trần Phước Sơn, khu kăn Đảng ƀô̆ Pơlê kong kân Đà Nẵng tối vâ ai tiô mâu pơkâ ‘na cheăng kâ tơbleăng pêi troh hơnăm 2030, tơdroăng vâ pêi troh hơnăm 2045 kal mơjiâng túa mơdêk pê lo, ‘mâi mơnhông cheăng kâ, mơdêk cheăng ƀă kơmăi kơmok ki lĕm nếo, xo khoa hok kŏng ngê̆, hơ’lêh hriăn plĕng ki nếo ƀă pơ’lêh kơxô̆ pro  xiâm:

"Pâ thế mơnhên tơdroăng pêi ƀă túa pêi cheăng tâk  nếo. Kố cho túa pêi cheăng tâk tâi tâng, tơkŭm tơtro pơla ki ai ƀă ki tê, ngăn ing hơ’lêh hriăn plĕng ki nếo, khoa hok kong ngê̆, luât pơkâ, mơngế pêi cheăng rơkê ƀă cheăng kâ kơxô̆. Má péa, ‘nâi nhên 3 tơdroăng ki xiâm cho ‘mâi mơnhông cheăng kâ, mê cho ‘mâi mơnhông kơvâ cheăng tiô troăng pêi cheăng ƀă kơmăi kơmok, tiô túa lĕm nếo ƀă số hóa. ‘Mâi mơnhông kơpong ki mơnhông tiô tơdroăng pêi tâk hên, hang lơng cheăng kâ ƀă cheăng kâ a têa kơxĭ. ‘Mâi mơnhông luât pêi cheăng khu mơdró, tăng mơngế pêi cheăng vâ mơdêk ki pơxúa, tơƀrê ƀă kâi châ tơbriât tê mơdró”.  

Mâu kăn tối, rôh apoăng Tơdroăng pêi pro châ pơkâ tơdrêng tung tơdroăng dêi hlá mơ-éa ai chêh. Tơdroăng mê ăm hlo ki mơ-eăm ôh tá tot to a troăng vâ pêi, mê thế chiâng tơdroăng pêi pro rơdêi dé pơlê pơla. Tơdroăng pêi pro cho túa vâ mơhno ăm hlo ki púi vâ mơnhông tơƀrê. Pôa Phan Văn Mãi, khu kăn Đảng ƀô̆ Kuô̆k hô̆i pâ thế:

"Pâ thế cho mơjiâng troăng hơlâ mơnhông kơpong cheăng kâ ki kal dêi tơnêi têa, tung mê tơkŭm ăm péa kơpong cheăng kâ xiâm peăng Kơnhŏng ƀă peăng Hdroh. Xua tơmeăm khoăng ai hlâu, tơnêi tíu dêi péa kơpong kô kân rơdâ. Drêng tơdroăng cheăng kâ tro tiô tơdroăng chêh pêi cheăng tiô pơkâ hdró mê kơpong kố châ tơrŭm pêi ai tiô pơkâ ki kân kô pơtối rak ki pơxúa, tơmeăm ai hlâu. Tâng péa kơpong ki mê ai môi tơdroăng cheăng mơnhông tro ‘ló,  hlối tơtro mê kô kâi mơnhông tơnêi têa”.

Mâu tơdroăng veăng hnê tối a tôh tơpui tơno xuân vâ môi tuăn tiô troăng mơjiâng pơlê pơla Việt Nam xông rơdêi, pêi cheăng rêh ối tro luât, rơkê plĕng, tơniăn hlối mơnhông tơƀrê. Ki kal hdrối cho ‘mâi rơnêu luât rêh ối pơlê pơla ƀă tơdroăng nhuô̆m luât, ‘mâi hơ’lêh tơdroăng cheăng pro hlá mơ-éa; hbrâ mơdât kâ kơluâ, mơdât mơ’nhiê liăn tơmeăm khoăng, pro ôh tá tro; mơjiâng mâu kăn ƀô̆ “lĕm tơdrăng, kơhnâ, khên tơchĕng tơmiât, khên pêi pro, khên pôu râng hnoăng cheăng tơná” vâ “luât phêp tơnêi têa” prôk tơdrêng ƀă “tuăn kuăn pơlê’’.