Mơ’nui peăng xêi hâi lơ 16/10, a Đà Nẵng, pôa Phạm Minh Chính - Ngế pro xiâm hnê ngăn Chin phuh veăng Leh tơbâ 80 hơnăm hâi mơjiâng khu lêng Kuân khu 5 hâi lơ (16/10/1945-16/10/2025) ƀă tơdah Mê dai Hồ Chí Minh. Khu 5 cho  kơpong tơnêi “eăng bâ tât khía mơhot kân peăng kơxê mơdât kong tô téa”; cho a tíu xiâm tơviah kal khât ‘na lêng, kring gak tơkăng kong.

Tung mâu hơnăm hdrối mê hía nah, mâu lêng tơplâ dêi Kuân khu 5 hiăng pêi klêi hnoăng cheăng; hlối mơjiâng kơpong hbrâ rơnáu tŭm tơdroăng, krá khât; hlối cho mâu lêng ki xiâm tung plâ mơdât ƀă pro kơdroh xía vâ kong prâi pro ôh tá tơniăn, tăng troăng mơdât pơreăng tâ tú; kum Kuăn pơlê mơnhông cheăng kâ, kơdroh kơklêa xăm kơtiê... Teăng mâ Kăn xiâm Đảng ƀă Tơnêi têa, pôa Phạm Minh Chính hiăng diâp Mê dai Hồ Chí Minh ăm mâu lêng tơplâ dêi Kuân khu 5 - pri mơhá ki kơnía mơhno hnoăng cheăng pêi, pleăng hnoăng tơná ƀă tơdroăng hmâ pêi pro ki lĕm tro ing ton nah dêi mâu lêng 80 hơnăm mơjiâng, tơplâ ƀă xông tơdêi.

Ngế pro xiâm hnê ngăn tơnêi têa loi khât khu lêng tơplâ Kuân khu 5 pơtối rak vế tơdroăng ki lĕm ing ton nah, mơ-eăm tâ nếo vâ châ ƀlêi trâng, ai hnoăng kân, veăng ‘no hnoăng kân kĭn ăm tơdroăng mơjâng ƀă kring vế Tơnêi têa.

Rôh kố, pôa Phạm Minh Chính veăng hôp hlối hnê mơhno a rôh pơxiâm pêi pro tơdroăng tơkêa bro Hngêi trung phôh thong hnê kuăn ngo ai tíu kâ koi ối pơtê, ai tíu koi pơtê kơhâi dế dêi Hngêi trung râ má môi ƀă râ má péa cheăm Tây Giang, Pơlê kong kân Đà Nẵng. Hngêi trung mê tâi tâng kơxô̆ liăn ‘no mơjiâng pro l.260 rơtal liăn, tiô tôi hdrối kô pro klêi a tơdế hơnăm kố ah.