Xông tơpui pơxiâm po, Trung tươ̆ng Lê Ngọc Hải, Kăn pơkuâ lêng Kuân khu 5 tối ăm ‘nâi, Dak Lak cho kong pơlê apoăng tung Kuân khu tơkŭm po pơtâp kơpong hbrâ mơdât râ kong pơlê tung hneăng hơnăm 2026 – 2031. Rôh pơtâp ai kơnâ kal khât vâ pơtối hlê plĕng pêi pro, pêi pro inhên mâu troăng tơmiât pêi, troăng prôk dêi Đảng, troăng hơlâ, luât dêi Tơnêi têa ‘na mơjiâng tơdroăng gâk kring tâi tâng kuăn pơlê ƀă tơdroăng gâk kring kuăn pơlê.

Tơdrêng amê mơdêk ivá pơkuâ, hnê mơhno, pơkuâ dêi khu râ kăn pơkuâ hnê ngăn cheăng Đảng, khu râ kăn pơkuâ; ai ivá tơbleăng tơdroăng cheăng, tơkŭm pêi pro dêi kơ koan, khu cheăng tung mơjiâng ƀă pêi cheăng kơpong hbrâ mơdât châ tơkŭm pêi pro tung tơdroăng pêi pro troăng pêi khu râ kăn pơkuâ 2 râ; ki má lối cho tung tơpui ƀă pêi pro mâu troăng tơmiât pêi ‘na gâk kring tơnêi têa - kring tơniăn.