Teăng mâ Khu pơkuâ hnê ngăn Đảng, Khu pơkuâ Kuân khu 7, Thiê̆u tươ̆ng Trần Vinh Ngọc, Phŏ Kăn pơkuâ hnê ngăn Đảng Kuân khu tối ăm mâu kăn ‘na tơdroăng a kong têa ê, tung kơpong ƀă tung tơnêi têa; mâu tơdroăng ki pêi pro tơƀrê ‘na hnoăng cheăng lêng, tơdroăng cheăng lêng gâk kring, mơjiâng Đảng ƀô̆ ƀă khu lêng kring vế Kuân khu tung hơnăm 2024, ai mâu hnoăng cheăng ki kal tung hơnăm 2025.

Kăn pơkuâ Khu pơkuâ ngăn Kuân khu 7 púi vâ, tung la ngiâ ah mâu kăn ƀô̆ xiâm khu lêng ki hiăng pơtê cheăng xua hiăng troh hơnăm, pêi cheăng tiô tơdroăng púi vâ pơtối tơmâng ngăn, veăng tơpui tối, mâu tơdroăng ki kơnía git tung mơjiâng tơdroăng cheăng lêng gâk kring tâi tâng kuăn pơlê, mơjiâng Khu lêng ƀă khu lêng kring vế Kuân khu krá rơdêi tŭm têk, veăng gum pêi pro tro hnoăng cheăng gâk kring cheăng lêng, mơjiâng ƀă rak vế Tơnêi têa.