Mâu hâi ki kố, troăng prôk ƀê tong ing tơdế cheăm MDrăk prôk troh a ƀuôn MSuốt hiăng hlo to hlá cơ khêi, hơlŏng trĭng, pano ki krâ drô troăng mơhno tối ‘na Hneăng hôp kân má XIV dêi Đảng. Tung hiâm mơno ki hơniâp ro dêi kuăn pơlê xua hiăng châ ko xo dêi kơtếo hên, mê đảng viên Y Liêu Niê, hdrông Rơđế, ối a ƀuôn MSuốt, cheăm MDrak tối ăm ngin ‘nâi, pêi pro tiô hneăng tơ’noăng koh hâk Hneăng hôp kân, vâi krâ-nhŏng o kơhnâ pêi cheăng kâ, pêt kơtếo, kơphế, kơxái tiu, sầu riêng, păn kơpôu ro, chu í, pêi lo hên liăn ngân, xua ti mê, tơdroăng rêh kâ ối dêi kuăn pơlê hiăng thăm mơnhông tơtêk. Dế nôkố, chi bô̆ ôh pá ai rơpŏng ki kơtiê, lâp pơlê bu ối 11 kơpêng 172 rơpŏng kơtiê. Hbrâ koh hâk hneăng hôp kân má XIV, mê ngoh Y Liêu Niê-đảng viên ai tơmiât hên tơdroăng ki pói  tơngah:

“Vâi krâ-nhŏng o pói rơhêng châ Đảng ƀă Tơnêi têa pơtối tŏng gum, veăng mơ’no liăn ngân mơjiâng pro troăng hơlâ prôk lăm, têa krúa, mâu rơchôa hno têa, hngêi trung, hngêi pơkeăng khăm pơlât; tơdrêng amê, ai hên troăng hơlâ ki veăng gum ăm kuăn ‘nĕng cháu chái hdrông kuăn ngo châ mơhriâm tŭm a hngêi trung, châ hriâm tơdroăng cheăng ai cheăng pêi tơniăn, ing mê, veăng gum mơjiâng pơlê cheăm rế hía rế kro mơdrŏng ƀă mơnhông tơtêk hên tâ”.

Ngế ki rơkê ‘na tơdroăng cheăng vâi krâ nah, inâi jâ cho H’Ring Mlô, 68 hơnăm, mơngế Rơđế, ối a ƀuôn M’Găm, cheăm MDrak tối ăm ngin ‘nâi, hneăng hdrối kố nah, kơnôm ai tơdroăng tŏng gum, ngăn khât dêi Đảng ƀă Tơnêi têa, rơtế ƀă hnoăng ki kơdo mơ-eăm dêi vâi krâ kuăn pơlê, mê ‘na rêh kâ ối dêi kuăn pơlê akố hiăng rế hía rế xông tơtêk hên, châ rak vế ‘na khôi túa, vêa vong dêi kuăn ngo. Tơná jâ rơtế ƀă mâu vâi krâ hơnăm hiăng hên tung pơlê kố đi đo kơdo mơ-eăm rak vế tơdroăng tĕn hmôu jiâ, pế drôu xiâm ƀă mâu tơmeăm khoăng túa lĕm tro ki ê... vâ mâu tơdroăng ki mê ôh tá hía tung la ngiâ. Méluâ ti mê, vâ tơdroăng ki rak vế mế châ krá tơniă ton, klêi kơ’nâi Hneăng hôp kân jâ pói rơhêng vâ rêm râ, mâu kơvâ cheăng pơtối ai troăng hơlâ ki tơtro, hnối pêi adrêng ƀă mơnhông kơvâ ôm hyô pơlê pơla ƀă hnối pơtối rak vế, mơdêk khôi túa, vêa vong dêi kuăn ngo Rơđế. Jâ H’Ring Mlô ai tối nhên tiah kố:

“Chiâk rơpŏng á ai troăng kân Đông Trường Sơn ƀă 1 ha 4 sao tơnêi ki hiăng pêt kơphế, loăng plâi ƀă ai mơdâng pro hngêi trá. Á pế drôu xiâm, teăn hmôu jiâ ƀă pơchên hmê kơchâi dêi hdrông Rơđế. Klêi kơ’nâi hneăng hôp kân kố ah, pói rơhêng mâu khu râ, kơvâ cheăng tŏng gum vâ rơpŏng á ƀă vâi krâ-nhŏng o tung ƀuôn MGăm mơnhông ôm hyô pơlê pơla, hnối pêi tơdrêng ƀă tơdroăng ki teăn hmôu jiâ, tôu chêng, tôu koăng. Nôkố, troăng prôk hiăng châ po rơdâ, tơdroăng ki po ôm hyô tung pơlê kô tơlêi hlâu tâ ahdrối nah, laga, kal ai tơdroăng ki veăng tŏng gum, po troăng hơlâ ki kân dêi Đảng ƀă Tơnêi têa”.

Pôa Y Khương-Phŏ Kăn pơkuâ hnê ngăn Đoân Droh rơtăm cheăm MDrak tối ăm ngin ‘nâi, khu rơxông nếo đi đo châ ngăn cho “nhái kŏng pêa hơ-‘vá dêi Đảng”, malối tung chal ki tơrŭm. Pêi pro tiô hnoăng cheăng tơ’noăng koh hâk Hneăng hop kân má XIV dêi Đảng, đoân viên, droh rơtăm cheăm MDrak hiăng kơhnâ khât tung pêi pro hên mâu tơdroăng cheăng ki ai pơxúa. Ai lối 2.550 ngế đoân viên ki veăng po văng nhâ, kơpuih văng hngêi trăng, troăng prôk, chuâ hlá cơ, krâ ƀăng-rôl, pano, mơhno tối ‘na Hneăng hôp kân. Ki rơhêng vâ tối, ing khế 7 hơnăm 2025 troh nôkố, lối chât rơpâu ngế đoân viên hiăng kơhnâ hnê tối ăm kuăn pơlê túa chêh bro hlá mơ-eá, chêh ‘măn tung kơmăi VNeID, veăng gum ăm pơlê cheăm châ pêi cheăng tơniăn lĕm. Tối ‘na hnoăng cheăng koh hâk Hneăng hôp kân má XIV, ngoh Y Khương Mlô ai pói tơngah:

“Klêi kơ’nâi Hneăng hop kân XIV dêi Đảng, á pói rơhêng vâ khu rơxông nêếo ngin kô pơtối châ mơhriâm, châ hlê plĕng hên tơdroăng ki nếo, châ tŏng gum, châ hlê plĕng mâu tơdroăng ki hloh rơkê chal nếo, ing mê, ai tơ’nôm roh ki tơ’lêi hlâu pơtối châ mơnhông hnoăng cheăng ki rơkê tâ tung pơhlêh kơxô̆; tơdrêng amê, veăng rak vế ngăn, pơtối mơdêk khôi túa, vêa vong, túa lĕm tro ƀă mâu tơdroăng ki gum ăm đoân viên droh rơtăm, vâi o phô̆m vâ xông kân”.

MDrak dế kố ai lối 22 rơpâu pơ’leăng mâ mơngế, vâ chê 40% cho hdrôâng kuăn ngo ki iâ mơngế, Đảng ƀô̆ cheăm ai vâ chê 1.200 ngế đảng viên dế pêi cheăng tung 56 khu pơkuâ hnê ngăn Đảng. ƀă tuăn loi Đảng ƀă Hneăng hôp kân XIV, ing mâu ngế đảng viên, kuăn pơlê troh a đoân viên, droh rơtăm pơrá veăng ‘no dêi hnoăng cheăng tơ’noăng, pêi chiâk pêi deăng, rak vế khôi túa, vêa vong, veăng gum mơjiâng khu pơkuâ ngăn krá rơdêi, pói tơngah môi hneăng Hôp kân kô ƀlêi chiâng, po ăm hneăng ki mơnhông nếo ăm pơlê cheăm.