A ƀuôn Akŏ Dhông, bêng Ƀuôn Ma Thuột, kuăn pơlê tơkŭm ‘na Hngêi hôp tơdjuôm pơlê pơla séa ngăn roh pơxiâm po Hneăng hôp má XIV dêi Đảng tung tơdroăng po kân krip, hâk ro. Nâ H’Tít Aliô̆, kuăn pơlê ƀuôn Akŏ Dhông tối:

‘’Tơmâng ngăn tơdrêng roh Hneăng hôp kân Đảng roh má 14 á hâk ro ƀă hâk tơngăm xua kố cho môi tung mâu troăng pêi ki kân dêi tơnêi têa pin. Á pói vâ Đảng ai troăng hơlâ mơnhông ‘na ôm hyô pơlê pơla vâ rak ƀă mơnhông khôi túa lĕm tro hdroâng kuăn ngo tung chal mot tơrŭm’’.

A ƀuôn Alê A, bêng Ea Kao, tơdroăng phiu ro xuân troh lâp mâu hngêi trá xŏn, a rêm troăng kân tung pơlê. Tung toăng hngêi hôp tơdjuôm pơlê pơla, kơdrâm kuăn pơlê hiăng tơkŭm hôp, tơmâng ngăn roh hôp apoăng dêi Hneăng hôp. Pôa Y Kanin, mơngế kăn pơlê tung ƀuôn Alê A tối:

“Kuăn pơlê tung pơlê ngin rơtế tơkŭm a Hngêi hôp tơdjuôm pơlê pơla vâ séa ngăn mâu tơdroăng ‘na Hneăng hôp. Ngin pói vâ hneăng hôp kô po hên troăng hơlâ, troăng pêi ki pơxúa, gum hên mơnhông cheăng kâ - rêh ối pơlê pơla, tơmâng hên tâ nếo troh kơpong kuăn pơlê hdroâng kuăn ngo, rak ƀă mơnhông khôi túa lĕm tro mâu hdroâng kuăn ngo, mơdêk ‘na tê mơdró kâ, pêi cheăng kâ a pơlê cheăm.’’

A peăng Mâ hâi Lo, a mâu pơlê tơnăng ká xi xŏng a têa kơxĭ, tơdroăng hâk ro ‘na Hneăng hôp tơkŭm kơdrâm phiu ro. Hên kuăn pơlê tơnăng ká xi xŏng loi tơngah ƀă pói vâ a mâu troăng pơkâ pêi djâ tơdroăng ki châ tơƀrê hluâ pơkâ, mơhnhôk ivá mơnhông tâi tâng, tơdrêng amê pói vâ ai tơ’nôm troăng hơlâ tŏng gum vâ hmiân  tuăn tơnăng ká xi xŏng a têa kơxĭ, gum rak krá tơniăn hnoăng pơkuâ têa kơxĭ rơlố dêi Tơnêi têa. Pôa Đặng Nhu, kuăn pơlê tơnăng ká xi xŏng bêng Phú Yên mơnhên tối:

‘’Ngin cho kuăn pơlê tơnăng ká xi xŏng, pói vâ Hneăng hôp kân Đảng ai troăng hơlâ mơnhông kơvâ ká xi xŏng vâ kuăn pơlê hmiân tuăn rêh ối tơnăng ká xi xŏng, rế mơnhông cheăng kâ, rế gâk kring hnoăng pơkuâ rak ngăn têa kơxĭ, rơlố’’.