Xông tơpui a tơdroăng ki kal, pôa Lae Dilokvidhyarat  - Kăn Kuô̆k hô̆i râ má môi – xuân cho môi yăo sư mơngế Siam xiâm rêi Việt Nam tối mơnhên: kố ôh tá xê to roh vâ tơbâ ƀă pâ mơnê, mê ối cho roh tơ’lêi vâ păn hiâm mơno pâ nhuô̆m tơnêi têa, hiâm mơno pôu râng hnoăng cheăng ƀă tơdroăng ki tơdjêp tung pơlê pơla.

Roh leh mơhno hiâm mơno ‘’Niân tiah hâi kố kơnôm hnoăng vâi krâ nah’’, tơdrêng amê cho rơkong pơchân ‘na ki kơnâ krih tơviah dêi hơniâp lĕm – xiâm kối ăm tơdroăng mơnhông krá tơniăn ƀă hơniâp lĕm dêi kuăn mơngế. Tơdroăng veăng gum rak khôi túa lĕm hdroâng mơngế, rak krá tơniăn tơdjêp pơla mâu rơxông mơngế Việt Nam hơngế pơlê xiâm, rơtế dêi pó tơbêng ăm môi pơlê pơla tơrŭm, rơkê ƀă tơmiât troh Tơnêi têa.