*Koh hâk tơbâ 80 hơnăm hâi mơjiâng tơnêi têa lơ 2/9, a pơlê Chưp, cheăm Pơ Lang, kong pơlê Gia Lai, vâi krâ kuăn pơlê Bơhnéa rơtế ƀă dêi rơpí kơtúa hlá cơ Tơnêi têa, tơkŭm po hên tơdroăng ki ai pơxúa mơhno hiâm mno pâ nhuô̆m pơlê xiâm, tơnêi têa. Kố cho rôh vâ kuăn pơlê hvái ngăn môi rôh ki tơplâ ó dêi tơdroăng ton nah hdroâng mơngế ƀă rơtế tơmiât troh la ngiâ bâ eăng. Pôa Đinh Brơi, 67 hơnăm, tung mê 44 hơnăm ối tung Đảng, cho krâ pơlê Chưp, cheăm Lơ pang, kong pơlê Gia Lai hâk tơngăm, tối:

“Hâi 2-9, hâi Mơjiâng tơnêi têa, tâi tâng kuăn pơlê a Tây Nguyên hiăng tơdjuôm tơdroăng ki hơniâp ro hâi tơniăn krê ƀă lâp tơnêi têa. Rôh ối tơxĭn nah, tơná á hiăng ‘nâi tơdroăng ki tơviah kố, mê drêng hiăng kân mê hiăng khŏm mơeăm pêi tiô ngoh Núp drêng plâ xâ Pơhlăng cho ôh tá vâ thu, pro têk ăm xâ. Mê hiăng veăng pro mố đô̆i, veăng gum ivá rôh tơnêi têa kal, tơrŭm môi hiâm mơno tiô Đảng, Tơnêi têa, kơnôm mê troh hơnăm 1975 nếo châ tơleăng tơnêi têa. Nôkố cheăng kâ, rêh ối rế hía rế mơnhông ƀă rế hlo ki hâk tơngăm tâ ‘na tơnêi têa Việt Nam tơná”.

*Krâ pơlê K’Keo, hdroâng kuăn ngo K’Ho, vâ chê 70 hơnăm, Kăn pơkuâ hnê ngăn Chi ƀô̆ thôn Hàng Làng, cheăm Di Linh, kong pơlê Lâm Đồng tối ăm ‘nâi, hriâm ƀă pêi tiô Pôa Hồ, tâi tâng 16 đảng viên tung chi ƀô̆ thôn đi đo djâ troăng ahdrối tung mâu tơdroăng pêi cheăng. Môi tiah krâ pơlê, mơhé hơnăm hiăng hên laga xuân ối chiu pá hriâm tâp xúa khoa hok tung pêt kơphế, báu klâng...ăm pêi lo châ hên. Tơdrêng amê rak khôi túa lĕm tro hdroâng  kuăn ngo, mơhnhôk kuăn pơlê mơjiâng tơdroăng rêh ối pơhlêh nếo. Krâ pơlê K’Keo tối ăm ‘nâi:

 ‘’Tâi tâng mâu đảng viên tung chi ƀô̆ pêi pro inhên tơdroăng cheăng ƀă hnoăng cheăng dêi đảng viên, đi đo djâ troăng ahdrối tung rêm tơdroăng cheăng mơnhông cheăng kâ, pêi lĕm tro troăng hơlâ luât dêi Đảng, Tơnêi têa; rak tơdroăng ki tơrŭm cheăng pơlê pơla, tung mê ai hên đảng viên hơnăm ối nếo. Kố cho mâu ngế ki djâ troăng ahdrối hriâm tâp tiô um méa Pôa Hồ vâ ăm kuăn pơlê a pơlê xo mê pro loăng rêk vê. Vâ chi ƀô̆ ó rơdêi mê khu pú hên đảng viên thế môi hiêm mơno, djâ troăng ahdrối tung tâi tâng mâu hnoăng cheăng mê nếo kêi đeăng tơdroăng cheăng châ pơcháu rêm hơnăm’’.

*Rơtế tơmiât ƀă pêi pro ‘na tơdroăng ki ngế krâ pơlê djâ troăng ahdrối ăm mâu rơxông nếo, pôa Liêng Hót Ha Kliêng (hdroâng kuăn K’Ho) ngế ki châ kuăn pơlê loi a thôn Srê Đăng, cheăm Tân Hội, kong pơlê Lâm Đồng, tối:

‘’ Hriâm tâp a Pôa cho hiâm mơno pâ nhuô̆m tơnêi têa, pêi pro tiô troăng hơlâ pơkâ dêi Đảng, Tơnêi têa. Péa cho vâi krâ kuăn pơlê tung pơlê ngin athế kơhnâ pêi cheăng, hnê khê̆n kuăn cháo, malối cho droh rơtăm pôi tá prôk tiô troăng ki ôh tá tro, pro xôi luât, athế ví pôi tá xúa ma tŭi, pôi tá ôu drôu ƀiêr. Athế tơrŭm, pôi tá tong hvĕng, pôi tá pro tơdroăng ôh tá tơniăn chiâng ôh tá tơrŭm pơla mâu hdroâng kuăn ngo nhŏng o, mê cho mâu tơdroăng klâi ki mâu ngế ki hiăng hên hơnăm hriâm tâp a Pôa ƀă athế djâ troăng tro tung pơlê cheăm”.

*Cho môi ngế ki kơhnâ rơkê nếo châ khu râ kăn pơkuâ cheăm Đăk Tô, kong pơlê Quảng Ngãi kheăn kơdeăn hdrối roh leh 2/9, jâ Y Xuân – hdroâng kuăn ngo Rơteăng, Kăn pơkuâ hnê ngăn cheăng Đảng hlối pro kăn pơkuâ thôn Kon Hring, phiu ro hơ’muăn:

‘’Á đi đo mơhnhôk kuăn pơlê mơjiâng thôn pơlê nếo, pơhlêh tơdroăng rêh ối, hngêi trăng thế pro kơnâng krúa lĕm, troăng kân, kơtâu thế pêt reăng vâ pro lĕm ăm thôn pơlê. Á pơhlêh kuăn pơlê pơhlêh troăng tơmiêt, troăng pêi, tah lôi troăng pêi cheăng kâ ki ôh tá tro xếo hdrối nah, pơhlêh loăng plâi ki tơtro ƀă tơnêi vâ mơdêk pêi lo liăn ăm rơpŏng hngêi. Tung thôn nôkố hiăng pơhlêh hên, ki má lóoi rơxông ối nếo nôkố vâi mơ-eăm kơhnâ pêi kâ, tơ’noăng dêi pó pêi cheăng kâ, hên rơpŏng châ rôe rơxế honđa, rơxế kái, kơmăi uâ kơphế..., hngêi ki lâi xuân rôe tŭm kơmăi kơmok vâ kum tung tơdroăng pêi cheăng’’.

*Hriâm tâp ƀă pêi tiô hiâm mơno, túa rêh ối, troăng tơdjâ Hồ Chí Minh, vâi kơdrâi ƀă droh rơtăm cheăm Čuôr Dăng, kong pơlê Dak Lak hiăng ƀă dế tơdjâk hiâm mơno tŏng gum dêi rơpó tung pơlê pơla. Ngế droh H’Xani Niê, hdroâng Rơđế, cho phŏ ngế pơkuâ vâi kơdrâi cheăm Čuôr Dăng, ăm ‘nâi:

“Khu vâi kơdrâi ƀă đoàn droh rơtăm cheăm Čuôr Dăng môi hiâm mơno tơdjuôm ivá, đi đo tơmâng tiô rơkong dêi Pôa Hồ hnê ƀă túa ki krếo thế mâu khu ki tơrŭm veăng pêi pro tŏng gum kuăn pơlê; pơtih mơeăm tŏng gum rơpŏng kơtiê, pôu kơ-êng mâu rơpŏng ki châ tơnêi têa gum ƀă hên ki ê. Đoàn Droh rơtăm cheăm ƀă khu vâi kơdrâi xuân tơrŭm ƀă dêi rơpó vâ rơtế ƀă dêi rơpó rak vế cheăng chal krâ dêi hdroâng kuăn ngo môi tiah tê̆n ếo pơtâk, hriâm hơdruê eirei, hriâm tŏn chêng koăng”.

*Ngoh Luy (hdroâng kuăn ngo Jarai) Kăn pơkuâ hnê ngăn cheăng Đoân cheăm Ia Băng, kong pơlê Gia Lai, mê pâ ‘nâng rơkong tơpui dêi Pôa Hồ: ‘’Tơdroăng ki klâi ai pơxúa ăm kuăn pơlê mê thế pêi tâi ivá, tơdroăng ki klâi ‘nêk kuăn pơlê mê thế ví’’. Ngoh tối ăm ‘nâi mâu tơdroăng pêi dêi droh rơtăm  a cheăm.

‘’Hnoăng cheăng dêi ngin cho mơdêk tơdroăng pơtâng tối vâ droh rơtăm ƀă kuăn pơlê hlê plĕng, ing mê rêh ối lĕm, rêh ối tro tiô rơkong pơchân hdrối dêi Pôa Hồ ai pơchân. Đoân cheăm hiăng thăm veăng tŏng gum kuăn pơlê tung tơdroăng pro mơ-éa định danh múc 2 ƀă cai phân mêm VNeID. Ing mê kum pêi pro mâu mơ-éa tơnêi têa thăm chiâng rĕng, tơ’lêi hlâu hên tâ. Đoân droh rơtăm cheăm Ia Băng hiăng tơrŭm rơtế mô đô̆i Quân đoân 3 tơkŭm po lo lăm mơgrúa, po nhâ, kui tah trâp hno têa ƀă tŏng gum pro troăng klông, kum kuăn pơlê prôk lăm tơ’lêi hlâu, pêt mơjiâng tơmeăm tơ’lêi hlâu tâ’’.

*Hơnăm kố cho 35 hơnăm, la ngoh A Định hiăng ai 10 hơnăm pro Bí thư chi ƀô̆ hlối pro ngế pơkuâ thôn Đăk Pung, cheăm Ngọc Tụ, kong pơlê Quảng Ngãi. Hriâm ƀă pêi tiô troăng tơdjâ túa rêh ối Hồ Chí Minh, ngih hiăng mơnhông cheăng kâ rơpŏng hngêi sap ing pêt kơphế, kơxu, păn chu prăng, păn í, păn ká; ƀă mơhnhôk hnê kuăn pơlê pêi tiô. Tơdroăng ki kơhnâ dêi ngoh hiăng gum vâi krâ kuăn pơlê Rơteăng a kơpong hngế hngo hluăn ing kơtiê, rế hía rế mơjiâng tơdroăng rêh ối nếo. Ngoh hâk tơngăm châ Ngế pro xiâm hnê ngăn Chin phuh diâp ăm ƀâng khê̆n kơdeăn. A Định ăm ‘nâi:

 “Mâu tơdroăng klâi ki pá mê pin athế pêi hdrối, pin athế djâ troăng tiô rơkong tối dêi kăn xiâm hnê ngăn Hồ Chí Minh “Đảng viên prôk hdrối, kuăn pơlê tiô ƀối kơ’nâi”, tung mê pin athế hnê vâi krâ kuăn pơlê túa pêi cheăng kâ, mơdêk pêi lo liăn ƀă hên ki ê hía. Môi tiah nôkố hbrâ troh rơnó xo dêi mâu tơmeăm, á rơtế ƀă kuăn pơlê lo lăm ‘mêng pro troăng tung thôn pơlê vâ tơ’lêi hlâu tung tơdroăng ki chơ tơmeăm pêi lo ing chiâk deăng troh a hngêi”.

*Ngoh Y’ Săn, ối a ƀon Dak Mâm, cheăm Đăk Săk, kong pơlê Lâm Đồng, tối ăm ‘nâi, đoân droh rơtăm tung pơlê đi đo tơkŭm po mâu roh hôp, mơhnhôk ƀă tơkŭm po mâu tơdroăng kum droh rơtăm rêh ối pôu râng hnoăng cheăng ƀă rơpŏng, pơlê. Ki rơhêng vâ tối cho mơdêk hiêm mơno hriâm tâp ƀă pêi tiô troăng tơdjâ hiêm mơno dêi Pôa Hồ, vâ tơdroăng rêh ối rế hía rế lĕm. Ngoh Y’ Săn, phiu ro.

‘’A rơpŏng mê á xuân tơtrŏng tung tơdroăng mơnhông cheăng kâ, pêi tiô mâu tơdroăng ki pơhlêh nếo tung tơdroăng rak ngăn kơphế, pêi klâng, kum mâu droh rơtăm ai tơdroăng rêh ối pá puât tâ dêi pơlê vâ rơtế dêi pó mơnhông cheăng kâ. Nôkố hiăng rơxông xúa kŏng ngê̆, á thế đi đo hriâm tâp, hriâm a dêi pó ƀă ‘nâi tơ’nôm mâu tơdroăng ki rơkê nếo vâ kô teăm tơdrêng pơhlêh nếo’’./.