A ƀuôn Alê A, bêng Ea Kao, kong pơlê Dak Lak, krâm kuăn pơlê tơkŭm dêi rơpó ối tung Hngêi kuăn pơlê hmâ tơkŭm hôp, tơmâng ngăn vâ ‘nâi hneăng hôp kân ing um tơvi. Pôa Y Kanin, tối:

"Rêm ngế akố môi tuăn, ai hên nhŏng o dêi mâu kuăn pơlê hdroâng kuăn ngo ki ê, ngin sôk ro hlối tơngah kô ai hên tơdroăng pơ’lêh nếo tung la ngiâ. Kăn hnê ngăn cho mâu ngế hlê plĕng hên, mâ ngăn hơngế tuăn tơmiât trâu rơdâ, á loi khât hneăng hôp kô klêi tơniăn lĕm. Tơngah hneăng hôp kô ai hên tơdroăng pơkâ mơhnhôk tŏng gum tung pêi chiâk, ‘no liăn pro tơmeăm khoăng, mơhno túa lĕm tro vâ mơnhông cheăng kâ”.

A pơlê Stơr, cheăm Tơ Tung, kong pơlê Gia Lai, ngoh Đình Bơn, tối:

 “Pơlê ngin cho pơlê ki ối hơngế hơngo kơtiê xơpá. A púi vâ klêi po hneăng Hôp Đảng kố, Tơnêi têa, mâu kăn rêm râ tơmâng hên tâ nếo troh mâu pơlê. Kuăn pơlê ngin púi vâ Hneăng hôp Đảng kô klêi tơniăn lĕm, ai pơkâ luât tơtro vâ mơnhông tơnêi têa”.

Ƀă tuăn loi khât kơ Đảng, pôa Lâm Tấn Bình, môi tung mâu ngế Chăm ki rơkê ối a cheăm Bắc Bình, kong pơlê Lâm Đồng pói tơngah, hneăng Hôp kân 14 dêi Đảng kô pơkâ mâu tơdroăng ki tro, ‘ló, cho tơdroăng ki kân, kal, ai tiô pơkâ mơnhông tơnêi têa, tung tơdroăng rêh ối nếo nôkố.

“Mâu kuăn ngo tối tơdjuôm ƀă tung mê ai kuăn ngo Chăm tơngah khât a mâu luât pơkâ ki ló tro dêi Đảng vâ kum ăm tơnêi têa Việt Nam xuân môi tiah mâu kuăn ngo pơtối mơnhông tung cheăng kâ, rak tuăn lĕm tro vêa vong dêi kuăn ngo. Vâ ai tiah mê, tâi tâng mâu kuăn ngo pơtối rak vế tơrŭm môi tuăn dêi rơpó tung hdroâng mơngế vâ veăng rơtế ƀă tơnêi têa mơnhông tơná tung rơxông nếo nôkố”.