Pôa Trần Thanh Mẫn, Kăn xiâm hnê ngăn Kuô̆k hô̆i tối ăm ‘nâi, hneăng hôp kô pêi pro hâi lơ 20/10 ƀă tiô tối hdrối mơgêi 12/12. Tiô tối hdrối, Kuô̆k hô̆i séa ngăn, pơkâ 45 tơdroăng tơkêa bro luât, tơdroăng pơkâ ‘na tơdroăng pêi cheăng mơjiâng luât; 13 khu tơdroăng xiâm ki tơdjâk troh cheăng kâ - rêh ối pơlê pơla, liăn ngân, séa ngăn ƀă mâu tơdroăng kal ki ê; tơdrêng mê, mâu kơ koan xuân pơtroh 13 khu tơbleăng vâ kăn teăng mâ hriăn plĕng.

Laga, troh nôkố nếo ai 16/45 tơdroăng xiâm mơjiâng luât châ Vi ƀan pơkuâ Kuô̆k hô̆i tơpui tối. Kăn xiâm hnê ngăn Kuô̆k hô̆i pơkâ thế mâu Ngế xiâm, Kăn xiâm hnê ngăn Hô̆i đong Hdroâng mơngế ƀă mâu Kăn pơkuâ Vi ƀan séa ngăn, tiô troh tá tui lui tơdroăng chêh, tơbleăng ƀă séa ngăn mâu tơdroăng tơkêa bro luât vâ tơniăn dâi lĕm, teăm tơdrêng tơdroăng mơjiâng pro, gum mơdêk châ tơƀrê tơdroăng mơjiâng luât.