A Rôh hôp má 14 pơla kố nah, Khu pơkuâ Tíu xiâm Đảng hiăng ăm rơkong tơpui ‘na mâu ngế pêi cheăng tung mâu inâi: Phŏ kăn hnê ngăn ki ai mâ đi đo Kuô̆k hô̆i hneăng XV ƀă Ngế ki cheăng tung Hngêi tơleăng xiâm klêi kơ’nâi châ pôk kô athế krâ kơlŏng xo pêi dêi hnoăng cheăng a ngiâ Kuô̆k hô̆i ƀă tơdroăng kố châ mơ’no tơdrêng tung rơ’jíu, um tơvi vâ kuăn pơlê ngăn. Kơxê rơtế tung hâi kố, Kuô̆k hô̆i tơpui a hngêi hôp kân ‘na péa tơdroăng tơkêa Luât Pơ’leăng mâ mơngế ƀă Luât Hbrâ mơdât pơreăng.

Ngế xiâm ngăn pơkeăng pơlât kô tơpui tối leăng, pro nhên mâu tơdroăng ki mâu kăn Kuô̆k hô̆i tối. Tiô tơdroăng pêi cheăng a măng tĭng kố, Kuô̆k hô̆i têk kŏng tơbleăng tơdroăng pơkâ ‘na túa ki mơnhông cheăng kâ rêh ối pơlê pơla hơnăm 2026; Pơkâ ‘na liăn ngân tơnêi têa hơnăm 2026; Pơkâ ‘na túa ki xoăng liăn tơnêi têa hơnăm 2026.