Kơ’nâi mê, Kuô̆k hô̆i tơkŭm po mơgêi hneăng hôp ôh tá tối hdrối roh má 9. Mâu pơkâ châ Kuô̆k hô̆i têk kŏng môi tuăn tơbleăng ăm pêi pro kơxo lơ 19/2, mê cho: Pơkâ dêi Kuô̆k hô̆i ‘na troăng hơlâ mơ’no liăn tơdroăng tơkêa bro mơjiâng troăng rơxế lơtreng Lào Cai – Hà Nội – Hải Phòng; Pơkâ mơnúa mâu troăng pơkâ pêi, troăng hơlâ ki phá tơ-ê, ki má môi vâ mơjiâng troăng rơxế lơtreng tíu kơdrâm kuăn pơlê rêh ối tê mơdró a Pơlê kong kân Hà Nội, Pơlê kong kân Hồ Chí Minh; pơkâ ‘na troăng pơkâ pêi, troăng hơlâ ki phá tơ-ê mơ’no liăn cheăng mơjiâng on tơhrik kơtâu ƀă trếo tik nik Ninh Thuận; Luât tơbleăng mơ-éa pơkâ luât (‘mâi rơnêu); Luât khu râ kăn pơkuâ kong pơlê (‘mâi rơnêu); Pơkâ ‘na tơleăng mâu tơdroăng tơdjâk troh rah xo bro lế lĕm tro khu pêi cheăng tơnêi têa.

Pơkâ tơ’nôm pơkâ mơnhông cheăng kâ – rêh ối pơlê pơla hơnăm 2025 ƀă pơkâ tơtêk châ 8% tơngi klêng; Pơkâ mơnúa mâu troăng hơlâ tah lôi tơvâ tơvân tung tơdroăng pêi cheăng khoa hok, kŏng ngê̆ ƀă pơhlêh tơmiêt pêi rơkê.

Hdrối mê, a hâi lơ 18/2, Kuô̆k hô̆i tơpui tơno, têk kŏng tiâ vâ tơbleăng Pơkâ dêi Kuô̆k hô̆i ‘na tơdroăng ‘mâi hơ’lêh kơxô̆ mơngế cheăng tung Chin phuh, pơkâ dêi Kuô̆k hô̆i ‘na mâi hơ’lêh kơxô̆ mơngế pêi cheăng tung Chin phuh hneăng Kuô̆k hô̆i má 15 (‘mâi hơ’lêh). Ing mê, tơdroăng tơkŭm dêi Chin phuh mê ai 14 khu xiâm ƀă 3 kơ koan tơdâng khu xiâm.

‘Na kơxô̆ mơngế tung Chin phuh ai 25 ngế mê cho Ngế pro xiâm hnê ngăn Chin phuh; 7 Phŏ Ngế pro xiâm hnê ngăn Chin phuh; 14 Ngế xiâm pơkuâ mâu tơdroăng cheăng ƀă 3 Ngế pơkuâ mâu kơ koan tơdâng Khu xiâm. Kuô̆k hô̆i xuân hiăng kĭ pôk pôa Mai Văn Chính ƀă pôa Nguyễn Chí Dũng pro Phŏ Ngế pro xiâm hnê ngăn Chin phuh, 4 ngế xiâm châ kĭ rôh kố, mê cho: Pôa Trần Hồng Minh, Ngế xiâm ngăn 'na Mơjiâng tơmeăm khoăng, pôa Nguyễn Mạnh Hùng, Ngế xiâm ngăn Khoa hok ƀă Kơmăi kơmok ƀă pôa Đỗ Đức Duy, Ngế xiâm ngăn ’na Chiâk deăng ƀă Hyôh kong prâi - Têa - Tơnêi, pôa Đào Ngọc Dung, Ngế xiâm ngăn Kuăn ngo ƀă Loi tĭng, tiô khôp.