VOV4.XơĐăng - Kơxê lơ 11/1, a roh mơgêi hneăng hôp ôh tá tối hdrối roh má môi, Kuô̆k hô̆i hneăng má XV, mâu kăn teăng mâ Kuô̆k hô̆i hiăng têk kŏng môi tuăn tơbleăng ăm pêi pro Pơkâ mơnúa mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ ƀă 92,79 kăn teăng mâ môi tuăn.

Pơkâ xêt khât pêi pro sap hâi lơ 1/3/2022 ƀă châ pêi pro tung 5 hơnăm. Pơkâ châ tơbleăng ăm pêi pro kô tah lôi mâu tơdroăng ki kreăng vâ Cần Thơ mơnhông mơdêk mâu tơmeăm ki ai hlâu, ki tơ’lêi hlâu vâ mơnhông mơdêk, mơhnhôk mâu khu râ vâ mơ’no liăn cheăng tung kơvâ ki ai tơmeăm mơnhông mơdêk rĕng, krá tơniăn, rĕng chiâng tíu kơdrâm kuăn pơlê rêh ối tiú xiâm kơpong tơbăng kroăng Cửu Long ƀă hên tơmeăm ki mơnhông mơdêk, tơ’lêi hlâu vâ mơnhông mơdêk ‘na pêi chiâk deăng, kơmăi kơmok, ôm hyô, tơdjêp tê mơdró ƀă tơrŭm lâp plâi tơnêi.

Tơdroăng Kuô̆k hô̆i tơbleăng ăm pêi pro Pơkâ mơnúa mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ kô cho ki vâ mơnhông vâ Cần Thơ rĕng xông tơtêk ó tung la ngiâ.

A Sa Ly tơplôu ƀă tơbleăng