Tơpui mơgêi hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i tối tiah kố, kố cho tơdroăng ki kal tung pêi pro mơjiâng luât, ai pơxúa kal khât gum ăm rôh kăch măng klâ xoăng, ‘mot tơkŭm kơ koan cheăng dêi khu pơkuâ tơdroăng kal kí ƀă teăm tŏng gum mâu tơdroăng xơpá, tơvâ ‘na troăng hơlâ, troăng tŏng gum, pro ivá mơnhông vâ pêi pro klêi mâu troăng prôk, mơnhôk tơlo liăn, pro tơnêi tơníu mơnhông nếo ăm kong pơlê ƀă lâp tơnêi têa.

‘Na tơdroăng mâu ngế cheăng xuân hiăng châ pêi pro krá tơniăn, tiô pơkâ dêi Đảng, luât Tơnêi têa, châ tơdroăng môi tuăn khât dêi mâu kăn Kuô̆k hô̆i. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế Chin phuh mơ-eăm khât vâ mơjiâng pro túa pơkâ, hlá mơ-éa pơkâ nhên tơdroăng kal châ pơcháu tung mâu luât ƀă pơkâ dêi Kuô̆k hô̆i; mâu kơ koan rĕng séa ngăn vâ ‘mêi pơhlêh, ‘mot tơ’nôm tơdroăng kal tung mâu hlá mơ-éa pơkâ luât ki ai tơdjâk troh klâ xoăng kơ koan cheăng kal pơkâ tơleăng tơdrêng, ki ôh tá chiâng pơkâ tơleăng tiô pơkâ tơdjuôm vâ pơkâ tiô hnoăng pơkuâ.