Pơtối Hneăng hôp ôh tá xê tiah hmâ rôh má 9, Kuô̆k hô̆i hneăng 15, hâi kố lơ 15/2 mâu kăn tơpui a Hngêi hôp kân ‘na tơdroăng tơkêa Luât Tơrŭm khu kăn pơkuâ kong pơlê ki ‘mâi pơhlêh; Tơdroăng tơkêa ‘mot tơ’nôm ‘na mơnhông cheăng kâ rêh ối pơlê pơla hơnăm 2025 ƀă ki xiâm cho mơnhông châ 8% tơngi klêng; Troăng pơkâ ‘no liăn pêi cheăng ăm tơdroăng tơkêa pro troăng rơxế lơ treng Lào Cai – Hà Nội – Hải Phòng; Kơxop hlá mơéa Pơkâ dêi Kuô̆k hô̆i pơkâ tíu mâu troăng hơlâ tŏng gum, troăng pơkâ xiâm, malối cho vâ pro troăng rơxế lơ treng kơphô̆ a pơlê kong kân Hà Nội, Pơlê kong kân Hồ Chí Minh. Tơdroăng pơkâ mơjiâng pro troăng rơxế lơ treng a Hà Nội, Pơlê kong kân Hồ Chí Minh hiăng châ Khu xiâm pơkuâ tơdroăng kal kí tơbleăng, vâ mơjiâng pro troăng rơxế lơ treng kơphô̆ troh hơnăm 2045, tiô riân tâi tâng kơxô̆ liăn kal vâ dêi Hà Nội cho 62 rơtal dollar Mih ƀă pơlê kong kân Hồ Chí Minh dâng 67 rơtal dollar Mih.

Ki xiâm hdrối châ Hà Nội ƀă Pơlê kong kân Hồ Chí Minh pơkâ mơ’no cho, troh hơnăm 2035 pơxiâm châ pro 17 to troăng, mâu troăng pro ƀă tâi tâng ki xŏn dâng 752 km, tơniăn ăm 35 – 50% mâu troăng prôk pơto chơ tơmeăm ăm pơlê pơla. Troh hơnăm 2045 ăm pro tơ’nôm 7 to troăng, 4 to troăng ƀă tâi tâng ki xŏn tơ’nôm dâng 355 km, tơniăn ăm 50 – 60% tơdroăng pơto chơ tơmeăm dêi pơlê pơla. Ing tơdroăng ki ai khât mâu tơdroăng tơkêa pro troăng rơxế lơ treng kơphô̆ tung pơla hdrối, mâu kăn Kuô̆k hô̆i tối tiah kố, tơdroăng ki pơkâ troăng hơlâ tŏng gum xiâm gá kal khât. Hà Nội ƀă Pơlê kong kân Hồ Chí Minh, cho tíu ki xiâm ‘na cheăng kâ, ai ivá tơdjâk kân. Tơdroăng ki pơkâ troăng hơlâ xiâm vâ mơjiâng pro troăng rơxế lơ treng a Hà Nội, Pơlê kong kân Hồ Chí Minh gum mơhnhôk tơlo hên kơxô̆ liăn, pro tơ’lêi hlâu ăm péa pơlê kong kân pêi pro ƀlêi chiâng mâu tơdroăng pơkâ pro troăng rơxế lơ treng kơphô̆ rak vế tơniăn rơkê plĕng, krá tơniăn.