A rôh tơpui tơno, pôa Trần Thanh Mẫn, Kăn xiâm hnê ngăn Kuô̆k hô̆i tối nhên Việt Nam ngăn nhuô̆m tơrŭm tơroâ khôi hmâ ƀă tơrŭm tung hên kơvâ cheăng pơla péa tơnêi têa, ngăn Panama cho kong têa tơrŭm cheăng xiâm a kơpong Mih Latinh. Kăn xiâm hnê ngăn Kuô̆k hô̆i tối nhên, Kuô̆k hô̆i Việt Nam môi tuăn khât ƀă mâu túa tơmiât pêi, troăng hơlâ thăm mơnhông tơrŭm cheăng pơla péa tơnêi têa hiăng châ môi tuăn, mâu tơdroăng tơkêa châ kĭ drêng rôh lăm pôu dêi kăn xiâm pơkuâ kong têa, tơhrâ kô rơtế prôk ƀă pro tơ’lêi hlâu ‘na troăng hơlâ luât vâ mơnhông mâu tơdroăng tơkêa pơla péa pâ, pêi pro pơhlêh mâu tơdroăng ki ai hlâu ‘na ivá tơrŭm cheăng ối hên pơla péa tơnêi têa.

‘Na tơrŭm cheăng pơla kơ koan mơjiâng luât péa tơnêi têa, Kăn xiâm pơkuâ kong têa Panama môi tuăn tơdroăng ki thăm mơdêk pơtroh mâu khu râ kăn troh a tơnêi dêi rơpó pơla Kuô̆k hô̆i Panama ƀă Kuô̆k hô̆i Việt Nam, tơpui tơno ‘na ki rơkê plĕng mơjiâng luât ƀă tơdroăng cheăng pơla mâu Vi ƀan, kơ koan mơjiâng luât péa tơnêi têa; mơdêk tâ nếo hnoăng cheăng dêi kơ koan mơjiâng luât tung pro tơ’lêi hlâu troăng hơlâ luât ăm tơrŭm cheăng pơla péa pâ, môi tuăn tơdjêp mâu kơ koan Chin phuh – kong pơlê – khu mơdró kâ ƀă tŏng gum lêi tah mâu tíu kreăng, thăm mơdêk mâu rôh tơ’lêi hlâu ‘na tơrŭm cheăng.