Sap ing phôn râng kŏng bu to hmâng ƀă krếo, jâ H’Bé Êban, a ƀuôn Ta B, cheăm Čuôr Dăng, kong pơlê Dak Lak, nôkố hiăng ‘nâi tăng ‘nâi mâu tơdroăng khăm, pơlât ƀaoh hiâm khăm pơlât ƀă chêh pro mâu hlá mơéa tung app ki hiăng cài đăt, tâ ‘măn tung phôn. Tơdroăng ki pơhlêh mê cho sap ing apoăng mâu rôh kăn ƀô̆ pơlê troh a hngêi hnê ăm vâi krâ nhŏng o hmâ ƀă kong ngê̆.

Ƀuôn Tah B, cheăm Čuôr Dăng, kong pơlê Dak Lak ai lối 340 rơpŏng, tung mê lối 90% cho hdrông kuăn ngo. Tơdroăng ki pá cho nâl tơpui ƀă tơdroăng ki pá ‘na kong ngê̆ pro ôh tá iâ ngế trâm pá drêng xúa ứng dŭng kơxô̆. Ngế cheăng tung Tôh Công ngê̆ kơxô̆ pơlê pơla troh rêm hngêi, hnê ƀă nâl Rơđế hlối hnê túa ki po tiê tung phôn ăm kuăn pơlê. Nâ H’Gói Niê, kăn Tôh trương Kŏng ngê̆ kơxô̆ pơlê pơla ƀuôn Tah B ăm ‘nâi:

“Á troh a rêm hngêi hnê vâi krâ nhŏng o xúa phôn râng kŏng, po ứng dụng VNeID, tiê mât khâuh, kơxô̆ phôn ƀă mâu tơdroăng ki chêh pro hlá mơ-éa ing troăng tung app mê. Á hnê vâi krâ nhŏng o ăm vâi pro xêh, hlối hnê tối vâ rêm ngế ‘nâi xo ah hmôi hên hlá mơ-éa chiâng vâ pro tơdrêng hlối tung phôn râng kŏng”.

Tơdroăng ki kơhnâ ƀă tá hiâm mơno dêi tôh kong ngê̆ kơxô̆ dế veăng gum pro pơhlêh túa ki châ ‘nâ tơdroăng kal, chêh pro mâu hlá mơ-éa ƀă tơdroăng ki hmâ xúa mâu tơmeăm ki pơxúa ing troăng hyôh internet. Jâ H’Kơm Êban, ngế pơkuâ Ƀuôn Tah, tối:

“Vâi krâ nhŏng o tung pơlê hiăng ‘nâi xúa phôn râng kŏng ki rơkê, po ứng dụng VNeID, kuet mah QR, nâp liăn ing điê̆n tưh ƀă pêi pro mâu hlá mơ-éa ing troăng hyôh internet. Ôh tá xê to xúa kong ngê̆, kuăn pơlê ối rế hía rế chêh pro mâu tơdroăng ki hdrối nah athế tơkôm ngế ki ê tŏng gum”.

Ing tơdroăng “Bình dân học vụ số” dế châ tơbleăng lâp lu a Dak Lak. Lối 2.000 Tôh Kŏng ngê̆ kơxô̆ pơlê pơla ƀă vâ chê 12.000 ngế cheăng hiăng châ mơjiâng, tŏng gum kuăn pơlê xúa chêh tối tung app, ing troăng hyôh internet, nâp liăn ôh tá xúa liăn mâ ƀă mâu tơdroăng ki kal. Pôa Bùi Thanh Toàn, Kăn pơkuâ Khu ngăn Khoa hok ƀă Kŏng ngê̆ kong pơlê Dak Lak ăm ‘nâi, tơdroăng ki veăng gum dêi tôh kong ngê̆ kơxô̆ pơlê pơla, dế veăng pro mơdêk ivá cheăng xúa internet tung um tơvi, rơ’jíu:

“Hơ'lêh cheăng xúa kong ngê̆ kơxô̆ ki hdrối tâ athế pơxiâm ing tơdroăng hơ'lêh nếo tuăn tơmiât, túa pêi. Tung pơla hdrối kố nah, khu kăn pơkuâ kong pơlê rơtế mâu ngế ki châ kuăn pơlê loi tơngah a pơlê cheăm hiăng veăng gum, tơbleăng pêi tơdroăng “Bình dân học vụ số' ing pŭn túa pơkâ: cheăm kơxô̆, bêng kơxô̆, thôn/pơlê kơxô̆ ƀă kuăn pơlê kơxô̆. Hên cheăm bêng hbrâ rơnáu djâ mâu troăng hơlâ kơxô̆ tung tơdroăng pơkuâ ƀă tơdroăng rêh ối, pro xiâm kối ăm hơ'lêh kơxô̆ dêi kong pơlê tung la ngiâ”.